पताल के लाली ह सँवारिस जीवन : 50 हजार के करजा ले शुरू होइस सफर

मंगली दीदी बनिस महिला मन के प्रेरणा
कोरिया, आदि कर्मयोगी अभियान अऊ छत्तीसगढ़ राज्य ग्रामीण आजीविका मिशन (बिहान) ह ग्रामीण महिला मन के जीवन म नवा ऊर्जा भरे हे। कोरिया जिला के सोनहत विकासखंड के छोट कन गाँव अंगवाही के मंगली दीदी ह इही योजना के लाभ उठाके टमाटर उत्पादन के संग आर्थिक रूप ले आत्मनिर्भरता के नवा कहानी लिखे हे। सिरिफ 50 हजार के करजा ले शुरू होय वोखर स्वरोगार के सफर ह मंगली दीदी ल महिला मन के प्रेरणास्रसेत बना देहे हे।
छत्तीसगढ़ राज्य ग्रामीण आजीविका मिशन के लक्ष्य स्‍व सहायता समूह मन के माध्यम ले उंखर आजीविका ल स्थायी रूप ले बेहतर बनाना अऊ गरीबी ल कम करना हे। ये मिशन ग्रामीण गरीब परिवार मन ल वित्तीय सेवा, कौशल विकास अऊ स्वरोजगार के अवसर उपलब्ध  कराथे, ताकि ओ मन स्वावलंबी बन सकंय। बिहान ले जुड़े के बाद मंगली दीदी ह स्व-सहायता समूह के माध्यम ले 50 हजार रुपिया के करजा लेके टमाटर के खेती शुरू करिस। जैविक खाद अऊ आधुनिक तकनीक के उपयोग करके वो ह अब तक 200 कैरेट टमाटर के उत्पादन करे हे अऊ लगभग 80 हजार रुपिया के आमदनी अर्जित करे हे। वो ह बताइस के अवइया बेरा म उत्पादन दोगुना होए के भरोसा हे, जेखर से आमदनी 1.80 लाख रुपिया ले जादा पहुँच सकत हे। ए प्रकार ले मंगली दीदी के किस्मत टमाटर के लालिमा ले बदले लगे हे।
मंगली दीदी ह बताइस के ग्राफ्टेड पौधा अऊ जैविक खाद के बदौलत वोखर टमाटर के बेहतर गुणवत्ता के सेती स्थानीय बाजार म अच्छा कीमत मिल पात हे। एखरे सेती आज मंगली दीदी गाँव के आन महिला मन खातिर प्रेरणा बन गे हे अऊ “लखपति दीदी” अभियान के सशक्त मिसाल घलोक हे। ओखर अगला लक्ष्य आन साग-भाजी के खेती करना अऊ जादा ले जादा महिला मन ल ए काम ले जोड़ना हे ताकि गाँव के सबो महिला मन आत्मनिर्भर बन सकंय।