पुल मन ले जुड़त गांव : मनखे मन ल मिलत हे आवागमन सुविधा

गौरेला-पेण्ड्रा-मरवाही, आवागमन के सुविधा सामाजिक-आर्थिक विकास म महत्वपूर्ण भूमिका निभाथे। बारामासी सड़क के सुविधा मिले ले गांव मन म शिक्षा, स्वास्थ्य अऊ रोजगार जइसे जरूरी सुविधा के लाभ उठाना आसान हो जाथे। व्यापार अऊ वाणिज्य ल बढ़ावा मिलथे। राज्य शासन ह पाछू तीन बछर म आवागमन के सुविधा ल बढ़ाए बर पुल-पुलिया अऊ सड़क निर्माण ल प्राथमिकता देहे हे। गौरेला-पेण्ड्रा-मरवाही जिला के सेमरदर्री-पसान मार्ग म सुखाड़ नाला म उच्‍च स्तरीय पुल संग पहुंच मार्ग बने ले 7 गांव मन के 9 हजार मनखे मन ल बारहमासी आवागमन के सुविधा मिलत हे। कंचनडीह-बारीउरांव मार्ग म सोन नदी म पुल संग पहुंच मार्ग बने ले 10 गांव मन के 12 हजार ले जादा गांव वाले मन ल अऊ बिलासपुर-कटनी रेल मार्ग म गौरेला तीर ओवरब्रिज ले निर्बाध यातायात के सुविधा मिलत हे।
सुखाड़ नाला म पुल के बन जाय ले मरवाही ले पसान (कोरबा) के दूरी 10 किलोमीटर कम हो गए हे। पहिली मनखे मन ल मरवाही ले कोटमी होत पसान जाना परय, जउन करीबन 40 किलोमीटर दरिहा हे। अब सीधा मरवाही ले सेमरदर्री होत पसान जाय के सुविधा हो गए हे। ये उच्‍च स्तरीय पुल 5.29 करोड़ रूपिया के लागत ले 14 जून 2021 के बनके तियार होए हे। पुल के लम्बाई 135 मीटर हे। पुल के बने ले मरवाही संग तीर-तखार के गांव बंसीताल, दानीकुंडी, सेमरदर्री, मगुरदा, करगीकला अउ मटियाडांड के गांव वाले मन ल बारहमासी आवागमन के सुविधा मिलत हे। उहें कंचनडीह-बारीउरांव मार्ग म सोन नदी म 2.11 करोड़ रूपिया के लागत के पुल संग पहुंच मार्ग ले 10 गांव मन के मनखे मन ल बारामासी आवागमन के सुविधा मिलत हे। एखर अलावा बिलासपुर-कटनी रेल मार्ग म गौरेला तीर निर्बाध यातायात सुविधा के दृष्टि ले 76.81 करोड़ रूपिया के लागत ले 2315 मीटर लंबा रेलवे ओवरब्रिज के निर्माण करे गए हे। लोक निर्माण विभाग ह ये मां 2234 मीटर पहुंच मार्ग, रिटेनिंग वॉल आदि के निर्माण करे हे। ये रेलवे ओवरब्रिज के निर्माण ले रेलवे क्रॉसिंग म आवागमन बाधित नइ होही अऊ यातायात सुचारू रूप ले जारी रहिही।