गुरूपूर्णिमा के दिन जिला म 40 हजार पौधा लगिस
मुंगेली, पौधा लगाना पुण्य के काम हे, पौधा पुत्र-पुत्री के समान होथे जइसे कि छोटे लइका मन के पालन-पोषण करके बड़े करे जात हे। ठीक वइसनहे नान्हे पौधा ह पोषण तत्व, सुरक्षा अऊ देखभाल ले बड़े वृक्ष के रूप लेथे। जिला के विकासखण्ड मुंगेली के ग्राम पौनी के 83 वर्षीय ननका बाई राशन कार्ड नवीनीकरण काम बर आए रहिस। एक मां ह धरती मां ल हरा-भरा बनाए बर आंगनबाड़ी केंद्र म एक पौधा लगाके पहिली अपन फर्ज निभाइस अऊ हर मनखे एक पौधा जरूर लगावंय ये संदेश दीस। एखर से प्रेरित होके ग्राम पौनी के 70 वर्षीय शीतला बाई अऊ आन महिला मन ह घलोक उत्साह ले वृक्षारोपण करिन। खाद्य अधिकारी श्री एसके मिश्रा शासकीय उच्चतर माध्यमिक शाला पौनी म नोडल अधिकारी बनके गये रहिन। ओला ननका बाई ह कहिन कि पौधा के देखभाल अऊ सुरक्षा जरूरी हे।
कलेक्टर डॉ. सर्वेश्वर नरेंद्र भुरे के मार्गदर्शन म हरियर छत्तीसगढ़ योजना के अंतर्गत गुरूपूर्णिमा के पावन अवसर म मुंगेली जिला म सबे स्कूल अऊ आंगनबाड़ी केंद्र मन म जबर वृक्षारोपण कार्यक्रम के आयोजन करे गीस अऊ एक महोत्सव के रूप म मनाये गीस। गुरूपूर्णिमा के दिन जिला म करीबन 40 हजार पौधा रोपे गीस।