बिलासपुर, 21 अक्टूबर 2020। सुदूर वनांचल नक्सल प्रभावित गाँव के बेटा जसवंत अऊ प्रदीप के सपना के उड़ान पूरा हो गए हे। ऊंखर सपना ल छत्तीसगढ़ सरकार के योजना ले पंख मिले रहिस अऊ उड़ान के हौसला घलोक। गरीब किसान के ये बेटा मन अब देष के प्रतिष्ठित आईआईटी अऊ एनआईटी म पढ़ाई करहीं।
अनुसूचित जाति वर्ग के छात्र जसवंत बांधे अऊ अनुसूचित जनजाति वर्ग के छात्र प्रदीप कुमार ध्रुव ह ये साल के जेईई मेन्स अऊ एडवांस परीक्षा म क्वालीफाई करे हें अऊ काउंसलिंग के पाछू जसवंत के आईआईटी जोधपुर अऊ प्रदीप के एनआईटी वारंगल म भरती होए हे। ए छात्र मन के कठिन परिश्रम अऊ लगन ले उंखर मुस्कल रद्दा ह आसान हो गए हे।
आदिम जाति अऊ अनुसूचित जाति प्री मेडिकल अऊ प्री इंजीनियरिंग परीक्षा पूर्व प्रशिक्षण योजना के तहत ए मन ल निशुल्क कोचिंग के सुविधा प्रीमियम कैरियर लांचर एकेडमी बिलासपुर म देहे गए रहिस। संगेच ऊंखर रहे के अऊ भोजन के निशुल्क व्यवस्था रहिस। छात्र जसवंत राजनांदगांव जिला के ग्राम गहीराभेड़ी अऊ प्रदीप महासमुंद जिला के ग्राम गुडरूडीह के निवासी हे। उमन प्रयास आवासीय विद्यालय बिलासपुर म 11वीं अऊ 12वीं पढ़ें हें। ये विद्यालय उन प्रतिभावान पढ़ईया लईका मन बर स्थापित हे जऊन नक्सल प्रभावित क्षेत्र मन के हें, जेखर सेती उंखर शिक्षा प्रभावित होथे।
दुनों छात्र मन ह पउर साल बारहवीं बोर्ड के परीक्षा बढि़या नंबर के संग पास करे रहिन। जसवंत ह पउर साल जेईई मेन्स परीक्षा क्वालीफाई करे रहिस अऊ ओखर चयन एनआईटी रायपुर बर होय रहिस। फेर वो आईआईटी म ही जाना चाहत रहिस। छात्र प्रदीप के चयन एनआईटी पटना म होय रहिस फेर समय म कागद जमा नइ करे के सेती ओखर प्रवेश नइ हो पाए रहिन। फेर दूनों छात्र मन म हौसला के कमी नइ रहिस। उमन निशुल्क कोचिंग के लाभ लेके फेर तैयारी करिन अऊ ये साल जेईई मेन्स अऊ एडवांस परीक्षा म बइठिन। ये पईत जसवंत के चयन आईआईटी जोधपुर अऊ प्रदीप के चयन एनआईटी वारंगल बर होय हे। अइसनहे निशुल्क कोचिंग के लाभ लेके अनुसूचित जनजाति वर्ग के छात्र हुमनलाल अऊ दिनेश कुमार खरे ह घलोक जेईई एडवांस परीक्षा क्वालीफाई करे हे। ये छात्र मन छत्तीसगढ़ शासन के आभारी हें जेखर सेती ए गरीब परिवार के प्रतिभावान लइका मन ल ऊंखर सपना साकार करे म मदद मिले हे।
