कृषि मंत्री ले शिकायत, 4 के खिलाफ मामला दर्ज
भिलाई, धमेन्द्र निर्मल के सार समाचार। पावर हाउस फल मंडी म बुधवार बड़े बिहिनिया फूट (खरबूजा) लेके आए तीन झिन किसान मन ले दलाल अउ ओकर हमाल मन जोरदरहा मारपीट कर दीन। मारपीट म घायल किसान मन ल उपचार खातिर अस्पताल पहुंचाए गइस। उहेंचे घटना ले आहत किसान संघ के नेता बिहिनिया 9 बजे छावनी थाना पहुंच गै। जेकर बाद दलाल सम्मेत चार लोगन मन के विरूघ्द मामला दर्ज करे गइस। पुलिस मन बताइन कि घटना के मुखिय आरोपी फरार हवय। उहेंचे ए मामले म एक झिन हमाल ल गिरफ्तार करके पूछताछ करे जात हावय।
मासूल गोंदी गांव ले फूट (खरबूजा) लेके बुधवार बिहिनिया किसान प्रकाश पटेल, महेंद्र पटेल अउ शिव पटेल पावरहाउस फल मंडी पहुंचे रिहिने। इही बीच फूट (खरबूजा) उतारे के बेरा एक झिन हमाल ह किसान मन संग गाली-गलौच कर दीस। धीरे-धीरे झगरा बाढ़ गै। हमाल मन के संगे संग दलाल मन तको किसान मन के जोरदरहा धुनई कर दीन। किसान महेंद्र पटेल के मुड़ म गहिर घाव लगे हे। ओला तुरत-फुरत पुलिस के रहिते अस्पताल पहुंचाए गइस। प्रकाश पटेल के गोड़ म चोट लगे हवय। फल लेके मंडी पहुंचे किसान मन के दलाल अउ उन्कर हमाल मन डंडा अउ लात मुटका म जमके पीटे हवय। ए घटना ले किसान जमके गुसियाए हवयं। अइसे जानबा होए हावय कि किसान मन घटना के शिकायत कृषि मंत्री रविंद्र चौबे ले घलो करे हावय। अभी पुलिस ह मामला के जांच म लगे हवय।
चटकारा
चिंगरी:- देख मैं कतेक उँच कूद सकथौ। (अँटियाइस अउ कूद दिस छपाक ले)
सरांगी:- तैं का मोला अइसने समझे हस रे ! महू तोर ले कम नइ हौं, देख !! (हाथ गोड़ ल तनियाइस अउ उहू कूद दिस – छपाक) ओतके बेरा केंवट के जाल पर गे
डेमचुल:- अब बने मजा आवत हे रे छपाक वाले हो ?