बलरामपुर, 20 अप्रैल 2020। नॉवेल कोरोना वायरस (कोविड-19) के बढ़त संक्रमण के रोकथाम बर पूरा देश मे लॉक डॉउन करे गए हे। बलरामपुर-रामानुजगंज जिला म घलोक एकर कड़ाई ले पालन करे जात हे, फेर लॉक डॉउन के सेती गांव अऊ शहर के सम्पर्क टूट गए हे, जेखर से गांव म रहइया ग्रामीण अऊ मजदूर बैंक आए म असमर्थ हें। जेखर सेती ऊंखर दैनिक उपयोग के सामान बर पइसा के दिक्कत झन होवय, ए खातिर अब जिला म राष्ट्रीय आजीविका मिशन के महिला बैंक सखी गांव म घर-घर जाके ग्रामीण अऊ मजदूर मन ल बैंकिंग सेवा देवत हें, जेखर से ग्रामीण मन के आर्थिक समस्या दूर होवत हे।
कलेक्टर श्री संजीव कुमार झा ह बताइन के जिला म संचालित राष्ट्रीय आजीविका मिशन शाखा के महिला बैंक सखी गांव वाले मन के घर-घर जाके जनधन खाता के राशि, मनरेगा मजदूरी, पेंशन राशि गांव वाले मन तक पहुंचावत हें। उमन बताइन के महिला हितग्राही मन के जनधन खाता म प्रधानमंत्री गरीब कल्याण योजना के तहत् 500-500 रूपिया के राशि देहे गए हे अऊ पूरा देश मे सबले जादा जनधन के खाता जिला बलरामपुर-रामानुजगंज म हे। जिला म 5 लाख खाता बैंकों म खोले गए हे, जेमा 1 लाख 58 हजार 510 खाता जनधन योजना के खाता हे अऊ ये मां 60 हजार बैंक खाता महिला मन के हे। जिला मुख्यालय म स्थित पंजाब नेशनल बैंक म केन्द्र शासन कोति ले 08 करोड़ रूपिया के मंजूरी मिले रहिस, जऊन अब हितग्राहि मन के बैंक खाता म आ गे हे। गांव वाले मन के मनरेगा मजदूरी, गैस सब्सिडी, बृद्धा पेंशन, दिव्यांग पेंशन ल घर-घर पहुंचाए बर बैंक सखी काम करत हें। कलेक्टर ह कहे हें के बैंक सखी योजना के शुभारंभ जिला म एक साल पहिली करे गए रहिस जऊन अब ये संकट के घड़ी म गांव वाले मन बर एक बरदान साबित होवत हे।
बैंक सखी श्रीमती सरोज ह बताइस के लॉकडाउन के सेती ग्रामीणजन घर ले बाहिर नइ निकल पावत हें। ओ मन ल बैंक जाय म अड़बड़ परेशानी होवत हे, ये सेती वो गांव वाले मन के घर पहुंच के उंखर जनधन खाता के राशि, मनरेगा मजदूरी, पेंशन राशि के भुगतान करत हे। ग्रामीण महिला श्रीमती शिवकुमारी संग आन गांव वाले मन ह बताइन के लॉकडाउन लागू होए ले हम बैंक जाय म असमर्थ हन। बैंक सखी ह हमार पैसा हमार घर म पहुंचावत हे, जेखर सेती जरूरत बर पइसा घरे म मिल जात हे। घर-घर बैंक सेवा पाके हम सबो ग्रामीण खुश हवन।