बलौदाबाजार : दुबारा भरे गीस धोबी तालाब

बलौदाबाजार, जिला मुख्यालय स्थित धोबी तालाब ल दुबारा पानी ले भरे गए हे। अपरेल महीना म एला पहिली पानी भरे गए रहिस। जबर गरमी अऊ तालाब म अड़बड़ भार परे के सेती ले तालाब म जलस्तर कम हो गए रहिस। जिला कलेक्टर श्री कार्तिकेय गोयल के निर्देश अउ शहर के नागरिक मन के मांग म सिंचाई विभाग ह एला एक दफा फेर पानी ले भर दे हे। नजदीक स्थित छुईया जलाशय म कम पानी होए के बाद घलव कईसनहो प्रयास करके सिंचाई विभाग ह पानी निकाले हे। पाछू 28 तारीक ले 30 तारीक तक तीन दिन तक नहर मन ले पानी ले लाके एला भरे गए हे। सिंचाई विभाग के ईई ह बताइस कि एखर से धोबी तालाब म अभी हाल के जलस्तर म करीबन ढाई-तीन फीट पानी के बढ़ोतरी हो गए हे। भरोसा हे के बरसात के आवत तक निस्तारी समस्या के एखर से निदान होही।