मुख्यमंत्री ह 19वां वसुंधरा सम्मान ले वरिष्ठ पत्रकार श्री तुषारकांति बोस ल करिस सम्मानित
दुर्ग, भयमुक्त वातावरण म सवाल पूछे के अधिकार ही असल लोकतंत्र हे। सवाल पूछना भारतीय परंपरा के हिस्सा हे। वेद मन म, उपनिषद मन म भारतीय मनीषा के सवाल पूछे के परंपरा हे। लोकतंत्र घलोक सवाल पूछे ले मजबूत होथे। जऊन सवाल मन ल उठाए ले संविधान मजबूत होथे ओला भयमुक्त होके जरूर पूछना चाही। ये आशय के विचार मुख्यमंत्री श्री भूपेश बघेल ह आज दुर्ग जिला के भिलाई म स्वर्गीय देवीप्रसाद चौबे के स्मृति म आयोजित वसुंधरा सम्मान कार्यक्रम म व्यक्त करिन।
मुख्यमंत्री ह कार्यक्रम म उन्नीसवां वसुंधरा सम्मान ले वरिष्ठ पत्रकार श्री तुषार कांति बोस ल सम्मानित करिन। ये बेरा म मुख्यमंत्री ह कहिन कि जब सवाल पूछना अपराध होथे त लोकतंत्र के जड़ खोखला होए लगथे। मुख्यमंत्री ह कहिन कि श्री बोस ह सीमित संसाधन के संग अपन कलम ल जीवंत रखिन, जऊन प्रशंसनीय उपलब्धि हे। दुर्ग विधायक श्री अरूण वोरा ह घलोक स्वर्गीय देवीप्रसाद चौबे के संग अनुभव ल साझा करिन। ये बेरा म कृषि मंत्री श्री रवींद्र चौबे अऊ आन जनप्रतिनिधि घलोक उपस्थित रहिन।
कार्यक्रम म वरिष्ठ संपादक श्री अंशुमान तिवारी ह घलोक अभिव्यक्ति के आजादी के मायने विसय म अपन संबोधन दीन। वरिष्ठ पत्रकार श्री रमेश नैयर ह कहिन कि छत्तीसगढ़ म निर्भीक पत्रकारिता के परंपरा रहे हे। छत्तीसगढ़ पत्रकारिता के संस्कारी जमीन ये। उमन स्वर्गीय देवीप्रसाद चौबे के संग अपन अनुभव घलोक साझा करिन।
