महतारी वंदन योजना बनिस ग्रामीण महिला मन के सहारा 18 किश्त ले श्रीपती नाग ल मिलीस आर्थिक मजबूती

रायपुर, मुख्यमंत्री श्री विष्णुदेव साय के अगुवई अऊ महिला अऊ बाल विकास मंत्री श्रीमती लक्ष्मी राजवाड़े के मार्गदर्शन म संचालित राज्य शासन के महत्वाकांक्षी महतारी वंदन योजना आज प्रदेश के महिला मन के जीवन म स्थायी आर्थिक मजबूती अऊ आत्मनिर्भरता के आधार बन गे हे।
योजना के अंतर्गत 1 मार्च 2024 ले अब तक प्रदेश के 69.19 लाख ले जादा पात्र विवाहित महिला मन ल कुल 11,728 करोड़ रूपिया के सहायता राशि सीधा ऊंखर बैंक खाता म जमा करे गए हे। हरेक महिला ल हर महिना 1,000 रूपिया के राशि बिना कोनो रुकावट के देहे जात हे। प्रदेश के सबो 33 जिला मन म ए योजना के लाभ समान रूप ले पहुंचत हे, जेमां सबले जादा लाभार्थी रायपुर, बिलासपुर, दुर्ग, राजनांदगांव अऊ जांजगीर-चांपा जिला मन म हे।
बलरामपुर जिला के विकासखंड सुर्रा गांव के श्रीपती नाग एकर एक प्रेरक उदाहरण हे। पहिली खेती बर खाद-बीज के व्यवस्था म ओ ल अऊ वोखर पति ल कड़क मशक्कत करना परय। कई पइत मौसम अनुकूल होए के बाद घलो पइसा के कमी ले समय म बोआई नइ हो पात रहिस। लइका मन के जरूरत टालके खेती म निवेश करना उंखर मजबूरी बन जात रहिस।
महतारी वंदन योजना ले जुड़े के बाद श्रीपती नाग ल अब तक 18 किश्त म कुल 18,000 रूपिया मिल गे हे। ए पइत वो ह पूरा राशि के उपयोग धान के फसल के बुआई म करिस, जेखर से ओ ल उधार लेहे के जरूरत नइ परिस। समय म बोआई अऊ भरपूर कृषि सामान उपलब्ध होए ले अब ओ ल बेहतर पैदावार के भरोसा हे। श्रीपती नाग ह मुख्यमंत्री श्री विष्णुदेव साय अऊ महिला अऊ बाल विकास मंत्री श्रीमती लक्ष्मी राजवाड़े के प्रति आभार जतात कहिन, महतारी वंदन योजना ह हमला केवल आर्थिक सहारा ही नइ देहे हे, बल्कि मेहनत के बेहतर फल मिले के विश्वास घलोक देवाए हे।