मुंगेली: इलेक्ट्रिक चाक ले कुंभकार धनईया बाई के बाढ़ही आमदनी

मुंगेली, 07 मार्च 2024। पारंपरिक व्यवसाय अपनाके अपन जीवनयापन करइया कुंभकार धनईया बाई अब इलेक्ट्रिक चाक मिले ले जादा समान बना सकही अऊ एखर से वोखर आमदनी घलोक बाढ़ही। कलेक्टर श्री राहुल देव ह आज जिला कलेक्टोरेट म धनईया बाई ल इलेक्ट्रिक चाक दीन अऊ ओ मन ल बधाई दीन। एकर संगेच उमन शासन के कई ठन योजना मन के लाभ उठाए बर प्रेरित करिन। कलेक्टर ह बताइस कि पीएम विश्वकर्मा योजना के तहत पारम्परिक व्यवसाय ले जुड़े शिल्पकार अउ कारीगर मन के पंजीयन करे जात हे अउ निःशुल्क कौशल प्रशिक्षण संग 500 रूपिया प्रतिदिन के दर ले स्टायपंड देहे जात हे। प्रशिक्षण के बाद ओ मन ल यंत्र अउ औजार बर 15 हजार रूपिया के अनुदान सहायता राशि घलोक प्रदान करे जात हे। ए बेरा म जिला पंचायत के मुख्य कार्यपालन अधिकारी श्री प्रभाकर पाण्डेय, मुंगेली एसडीएम श्री प्रवीण तिवारी मौजूद रहिन।
कुंभकार धनईया बाई ह बताइस कि वो चाक के माध्यम ले मिट्टी के दीया संग कई उपयोगी सामान बनाए के काम करथे। ये ओखर पारंपरिक व्यवसाय ये। वो ह बताइस कि एक महीना म लगभग 03 हजार के दीया बनाए के काम वो ह करथे अऊ ये मां वोखर परिवार के आन सदस्य घलोक सहयोग करथें। तिहार अऊ परब मन म दीया के मांग बाढ़ जाथे। जिला प्रशासन ह अब इलेक्ट्रिक चाक देहे हे ते ह काम म बड़ मददगार साबित होही। वो ह इलेक्ट्रिक चाक मिले म मुख्यमंत्री श्री विष्णुदेव अऊ जिला प्रशासन के प्रति आभार व्यक्त करे हे। ग्रामोद्योग विभाग के सहायक संचालक श्री डी. डी. पटेल ह बताइस कि श्रीमती धनईया बाई ह इलेक्ट्रिक चाक बर आवेदन करे रहिस, आवेदन के परीक्षण के बाद छत्तीसगढ़ माटी कला बोर्ड के तहत पात्रतानुसार इलेक्ट्रिक चाक प्रदान करे गीस। कार्यालय सहायक श्री विरेन्द्र जायसवाल ह बताइस कि इलेक्ट्रिक चाक ले कुंभकार माटी के दिया अऊ आन माटी-आधारित समान मन ल लउहे आकार दे सकत हे।