मुख्यमंत्री दाउ भूपेश बघेल मुख्यमंत्री ह गोताखोर मछुआरा मन के साहस सहराइस : स्वेच्छानुदान मद ले पांच झिन मछुआरा मन ल एक-एक लाख रूपिया दीन

रइपुर, 19 अगस्त 2021 बुधवार। मुख्यमंत्री दाउ भूपेश बघेल ह रइपुर के खारून नदी म सम्मार के पांच झिन बूड़त लोगन मन के जान बचइया नाविक अउ गोताखोर मछुआरा संघ समिति महादेवघाट के अध्यक्ष श्री लोकनाथ धीवर अउ उन्कर चार झिन संगवारी गोताखोर मन के साहस ल सहराइस। मुख्यमंत्री दाउ भूपेश बघेल ह नदी म बूड़़त पांच झिन लोगन मन के जीवन रक्षा बर अदम्य साहस अउ बहादुरी देखइया गोताखोर सर्वश्री लोकनाथ धीवर, माखन धीवर, डायमंड धीवर, शेषनारायण धीवर अउ देवकुमार धीवर ल बधाई अउ शुभकामना देवत अपन स्वेच्छानुदान मद ले एक-एक लाख रूपिया के राशि देहे के स्वीकृति दीन।
मुख्यमंत्री मंत्री दाउ भूपेश बघेल ले उन्कर घरू कार्यालय म संसदीय सचिव श्री विकास उपाध्याय के नेतृत्व म आये नाविक अउ गोताखोर मछुआरा संघ समिति महादेवघाट रइपुर के अध्यक्ष अउ सदस्य मन मुलाकात करीन जउन मन पीछू सम्मार 16 अगस्त के मंंझनिया 4 बजे एक झिन बूड़त मनखे अउ संझा साढ़े 6 बजे के लगभग एके परिवार के 4 सदस्य मन ल बूड़े ले बचाए रिहिन।