मुख्यमंत्री निवास म धूम-धाम ले मनाए गीस पोरा-तीजा तिहार
Surabhi Tiwari
मुख्यमंत्री सपरिवार भगवान शिव अऊ नंदी-बइला के पूजा करके प्रदेशवासी मन ल दीन शुभकामना
कर्मा, सुआ, राउत नाचा अऊ पंथी के नर्तक दल मन ह बगराईन छत्तीसगढ़ी संस्कृति के छटा
रायपुर, मुख्यमंत्री श्री भूपेश बघेल आज अपन निवास म आयोजित पोरा-तीजा तिहार म धर्मपत्नी श्रीमती मुक्तेश्वरी बघेल के संग भगवान शिव अऊ नदीश्वर के पूजा-अर्चना करके प्रदेशवासी मन के सुख अऊ सृमद्धि के कामना करिन। मुख्यमंत्री श्री भूपेश बघेल ह खेती-किसानी अऊ छत्तीसगढ़ी संस्कृति के चिनहा पोला तिहार के प्रदेशवासी मन ल बधाई अऊ शुभकामना देवत कहिन कि छत्तीसगढ़ धन-धान्य ले भरपूर रहय अऊ हमार पशुधन हमर तरक्की म सहाय बने रहय।
हरेली के बाद छत्तीसगढ़ के पारम्परिक तिहार ‘पोरा-तीजा‘ ल व्यापक स्तर म मनाए बर मुख्यमंत्री के रायपुर स्थित निवास म विशेष इंतजाम करे गए रहिस। छत्तीसगढ़ के परम्परा अऊ रीति-रिवाज के मुताबिक साज-सज्जा करे गए रहिस। कर्मा, सुआ, राउत नाचा अऊ पंथी के नर्तक दल मन के मनोरम प्रस्तुति ह तिहार म छत्तीसगढ़ी संस्कृति के छटा बिखेर दीन। झमाझम बारिश के बीच नर्तक दल मन ह मोहक प्रस्तुति दीन। मुख्यमंत्री श्री भूपेश बघेल ह सबो के उत्साहवर्धन करत पोरा-तीजा के शुभकामना दीन। ये बेरा म बइला के मुखौटा लगाए लइका मन विशेष आकर्षण के केन्द्र रहिन।
अनुसूचित जाति अऊ आदिमजाति विकास मंत्री डॉ. प्रेमसाय सिंह, खाद्य अऊ संस्कृति मंत्री श्री अमरजीत भगत, महिला अऊ बाल विकास मंत्री श्रीमती अनिला भेंड़िया, राज्यसभा सांसद श्रीमती छाया वर्मा, विधायक श्री कुलदीप जुनेजा, श्री विकास उपाध्याय, श्रीमती संगीता सिन्हा, पूर्व महापौर डॉ. किरणमयी नायक संग बहुत अकन जनप्रतिनिधि अऊ बड़ संख्या म महिला मन उपस्थित रहिन।
पोरा-तीजा तिहार म रंग-बिरंगा कुरथ-गहना-गाठा म प्रदेश के कई हिस्सा ले बड़ संख्या म महिला मन इहां पहूंचे रहिन। मुख्यमंत्री निवास म तीज मनाए आए महिला मन बर श्रृंगार के व्यवस्था घलोक करे गए रहिस। महिला मन बर मेंहदी, आलता लगाय के संगेच रंग-बिरंगी चूड़ी मन के व्यवस्था घलोक रहिस। महिला मन ह ये बेरा म आयोजित जलेबी दौड़, मटकी डांस, कबड्डी संग बहुत अकन खेल मन म बड़ उछाह ले हिस्सा लीन। छत्तीसगढ़ के सुप्रसिद्ध लोक गायिका श्रीमती ममता चन्द्राकर ह साज-श्रृंगार के संग अरपा-पैरी के धार के संग ही बहुत अकन लोक गीत मन के सुमधुर प्रस्तुति दीन। राज्यसभा सांसद श्रीमती छाया वर्मा, विधायक श्रीमती संगीता सिन्हा, पूर्व महापौर डॉ. किरणमयी नायक संग उपस्थित महिला मन ह घलोक नृत्य म हिस्सा लीन। पोरा-तीजा तिहार के अवसर म भगवान शिव अऊ नंदी-बैल के पूजा करे गीस। तीजा महोत्सव बर प्रदेश के कई जगा ले बहिनी मन ल इहां नेउते गए रहिस। ये बेरा म बहिनी मन कोति ले करूभात खाए के रस्म पूरा करे गीस।
