मुख्यमंत्री श्री भूपेश बघेल ह करिन कृष्ण कुंज के लोकार्पण

रायपुर, मुख्यमंत्री श्री भूपेश बघेल ह आज राजनांदगांव विधानसभा क्षेत्र म भेंट मुलाकात कार्यक्रम के समय राजनांदगांव नगरीय निकाय म बनाय गए कृष्ण कुंज के लोकार्पण करिन अऊ कपूर के पौधा घलोक लगाइन। मुख्यमंत्री ह इहां श्रीमती सूर्यमुखी देवी राजगामी संपदा न्यास राजनांदगांव कोति ले प्रदत्त खेल सामान, हॉकी स्टिक खिलाड़ि मन ल वितरित करिन। संगेच उमन 5 महिला मन ल सिलाई मशीन घलोक वितरित करिन। ये मौका म खिलाड़ी मन ले बात करके मुख्यमंत्री ह उंखर हौसला घलोक बढ़ाइन। मुख्यमंत्री ह खिलाड़ी मन ल आशीर्वाद देवत तन अऊ मन ले खेले ल कहिन। संस्कृति मंत्री श्री अमरजीत भगत घलोक ये बेरा म उपस्थित रहिन।
राज्य शासन कोति ले सांस्कृतिक विरासत ल सहेजे बर कृष्ण कुंज विकसित करे के पहल करे गए हे। पर्यावरण ल सहेजे, पेड़ मन ल बचाय अऊ अवइया पीढ़ी ल पर्यावरण अऊ पेड़ के महत्व के प्रति जागरूक करे के उद्देश्य ले कृष्ण कुंज स्थापित करे जात हे । कृष्ण कुंज नगरीय क्षेत्र मन म स्थापित करे जात हे, जिहां बरगद, पीपल, कदम, आम, इमली, बेर, जामुन, गंगा बेर, शहतूत, चिरौंजी, नीम, गूलर, पलाश, अमरुद, सीताफल, बेल जइसे अनेक महत्व के पेड़ रोपण करे के काम योजना हे।