रायपुर, 07 जुलाई 2024। छत्तीसगढ़ के राजधानी रायपुर म इतवार के रथयात्रा धूमधाम ले मनाए गीस। मुख्यमंत्री श्री विष्णु देव साय राजधानी रायपुर के गायत्री नगर स्थित जगन्नाथ मंदिर म आयोजित रथ यात्रा म सामिल होइन। रायपुर के गायत्री नगर स्थित जगन्नाथ मंदिर म विशेष रस्म के संग रथ यात्रा निकाले गीस। रथ यात्रा शुरू करे ले पहिली भगवान के प्रतिमा ल रथ तक लाए गीस अऊ रद्दा ल सोना के झाड़ू (बहिरी) ले साफ घलोक करे गीस। ए रस्म ल छेरापहरा रस्म कहे जाथे।
ए मौका म मुख्यमंत्री श्री विष्णुदेव साय ह सबो प्रदेशवासी मन ल रथयात्रा के बधाई देवत कहिन के ये पर्व ओडिशा बर जतका बड़ उत्सव हे, वोतकेच बड़ उत्सव छत्तीसगढ़ बर घलोक हे। महाप्रभु जगन्नाथ जतका ओडिशा के मनखे मन ल प्रिय हे, वोतकेच छत्तीसगढ़ के मनखे मन ल घलोक प्रिय हे, अऊ उंखर जतका कृपा ओडिशा उपर रहे हे, वोतनेच कृपा छत्तीसगढ़ उपर रहे हे।
श्री साय ह कहिन के भगवान जगन्नाथ किसान मन के रक्षक यें। उंखरे कृपा ले बरसा होथे। उंखरे कृपा ले ले धान के बाली मन म दूध भरथे। अऊ उंखरे कृपा ले किसान मन के घर म समृद्धि आथे। में भगवान जगन्नाथ ले प्रार्थना करत हंव के ए साल घलोक छत्तीसगढ़ म भरपूर फसल होवय। उमन कहिन के भगवान जगन्नाथ, बलभद्र अऊ सुभद्रा ले मोर प्रार्थना हे के ओ मन हम सबो उपर अपन कृपा बनाए रखयं अऊ हमला शांति, समृद्धि अऊ खुशहाली कोति अग्रसर करयं।