मनखे मन ल शांति, सदभावना, देश के एकता अऊ अखंडता के देवाइन शपथ
रायपुर, मुख्यमंत्री श्री भूपेश बघेल आज राजधानी रायपुर म पूर्व प्रधानमंत्री स्वर्गीय श्री राजीव गांधी के जयंती के अवसर म आयोजित सदभावना दौड़ म सामिल होइन। सदभावना दौड़ के आयोजन गांधी चौक ले राजीव गांधी चौक तक करे गीस। सदभावना दौड़ म बड़ झन स्कूली लइका, जनप्रतिनिधि अऊ प्रबुद्ध नागरिक सामिल होइन। मुख्यमंत्री ह गांधी चौक ले झंडी देखा के दौड़ के शुभारम्भ करिन। ओ मन खुदे लइका मन के संग दउडि़न।
सदभावना दौड़ के राजीव गांधी चौक म पहुँचे म मुख्यमंत्री ह पूर्व प्रधानमंत्री स्वर्गीय श्री राजीव गांधी के फोटू म माल्यार्पण करके ओ मन ल विनम्र श्रद्धांजलि दीन। उमन स्कूली लइका मन संग उपस्थित सबो मनखे मन ल शांति, सदभावना, देश के एकता अऊ अखंडता के शपथ देवाइन। कार्यक्रम के आयोजन नगर निगम रायपुर कोति ले करे गीस। ये बेरा म नगरीय विकास मंत्री डॉ. शिव कुमार डहरिया, राज्यसभा सांसद श्री पी.एल. पुनिया अऊ श्रीमती छइंहा वर्मा, विधायक सर्वश्री सत्यनारायण शर्मा, श्री मोहन मरकाम, श्री कुलदीप जुनेजा, श्री विकास उपाध्याय, नगर निगम रायपुर के महापौर श्री प्रमोद दुबे, पूर्व महापौर श्रीमती किरणमयी नायक घलोक उपस्थित रहिन।
मुख्यमंत्री श्री भूपेश बघेल ह ये बेरा म पूर्व प्रधानमंत्री स्वर्गीय श्री राजीव गांधी ल नमन करत ऊंखर योगदान ल याद करिन। उमन कहिन कि पंचायती राज, संचार क्रांति, 18 साल के युवा मन ल मताधिकार अऊ पर्यावरण अधिनियम श्री राजीव गांधी के देन ये। उमन देश के एकता अऊ अखंडता बर अपन प्राण के आहुति दीन। उंखर जयंती म विशेष ग्रामसभा के आयोजन करे जाथे। नवोदय विद्यालय घलोक उंखर महत्वपूर्ण देन हे। आज नवोदय विद्यालय म वृक्षारोपण के कार्यक्रम आयोजित करे जाही। धमतरी जिला के नगरी विकासखंड के ग्राम दुगली म जिहां श्री राजीव गांधी करीबन 34 साल पहिली आए रहिन, उहां उंखर प्रतिमा के आज अनावरण करे जाही।