- धान के समर्थन मूल्य बाढ़े ले किसान मन के क्रय शक्ति बाढि़स-श्री भूपेश बघेल
- चीला-चटनी के स्वाद ले, गेड़ी म चढ़कर स्वीकार करिस अभिवादन
- त्यौहार के उत्साह ल बढ़ात मुख्यमंत्री ह गेड़ी म चढ़कर सबला हरेली के बधाई दीन
- उमन नरियल फेंकिन अऊ भौंरा चलाइन
रायपुर, मुख्यमंत्री श्री भूपेश बघेल ह आज बिलासपुर जिला के तखतपुर विकासखंड के ग्राम नेवरा के नवा बने गौठान म गांव वाले मन के संग हरेली तिहार मनाइन अऊ जिला म बनाये गए 26 मॉडल गौठान के लोकार्पण करिन। उमन ये बेरा म कहिन कि धान समर्थन मूल्य बढ़ाए ले किसान मन तीर पइसा आए हे अऊ एकर लाभ केवल किसान मन ल नहीं बल्कि मजदूर अऊ व्यापारी मन ल घलोक मिले हे। इही के चलते प्रदेश म आटोमोबाइल्स अऊ सोना-चांदी के बिक्री म घलोक वृद्धि होए हे।
छत्तीसगढ़ के पहिली पारम्परिक त्यौहार हरेली मुख्यमंत्री श्री भूपेश बघेल के उपस्थिति म ग्राम नेवरा म उत्साह अऊ उमंग के संग मनाए गीस। मुख्यमंत्री ह इहां के गौठान म चरवाहा अऊ गाय-बछड़ा के मूर्ति के अनावरण करिन, कृषि औजार मन के पूजा करिन अऊ गाय मन ल कलेवा खवाइन। मुख्यमंत्री ल खुमरी घलोक पहनाए गीस। उमन गौठान के चरवाहा मन ल लाठी, नारियल अऊ गमछा देके रोका-छेका के रस्म अदा करिन। रोका-छेका के रस्म हरेली के पूजा के बाद करे जाथे। किसान अपन पशु मन ल ये कहिके चरवाहा मन ल सौंपथें कि आज ले पशु मन के देखभाल के जवाबदारी तोर हे। ये बेरा म उपस्थित गांव वाले मन ल छत्तीसगढ़ी म सम्बोधित करत मुख्यमंत्री श्री बघेल ह ओ मन ल ‘गाड़ा-गाड़ा’ बधाई दीन।