मोहला, मोहला मानपुर अम्बागढ़ चौकी जिला के भव्य शुभारंभ मुख्यमंत्री श्री भूपेश बघेल के करकमल ले होइ। उमन ये बेरा म जिला के नक्सा के अनावरण घलोक करिन। ये मौका म अपन संबोधन म मुख्यमंत्री ह नवा जिला के शुभारंभ म जिलावासी मन ल बधाई दीन। उमन जिला के तीनों ब्लॉक के विकास बर 3 करोड़ रूपिया के घोषणा करिन। उमन कहिन कि राजनांदगांव अतका बड़ जिला रहिस कि आखरी कोना म रहत मनखे ल जिला मुख्यालय पहुंचे म ही संझा हो जात रहिस फेर अब ये दिक्कत दूर हो गे। सरकार के ये निर्णय ले अभूतपूर्व खुशी मोला दिखीस। आज रोड शो म जेन भीड़ दिखीस, ओखर से स्पष्ट हे कि मनखे मन के लाभ बर कतका बड़का फैसला लेहे गीस।
उमन आगू कहिन कि छत्तीसगढ़ ‘महतारी के कोरा म नवा जिला जुड़ गे हे’। अंदरूनी गांव के मनखे मन ल जिला मुख्यालय बर 170 किमी तक घलोक जाना परत रहिस। रात के राजनांदगांव म ही रुके परत रहिस। अब आखरी गांव के मनखे ल घलोक मात्र 70 किमी दूरी ही तय करना होही। मनखे मन के मुश्किल कतेक कम हो गे।