राजस्व शिविर ले किसान मन के समस्या के होवत हे लउहे निपटारा

अधिकारी मन घर-घर पहुंच के देवत हें किसान किताब

बिलासपुर, राजस्व मामला मन के निराकरण बर जिला म राजस्व शिविर के सिलसिला आज ले शुरू हो गीस। कलेक्टर श्री सौरभ कुमार के विशेष पहल म जिला म करीबन 5 महीना के कार्यक्रम तियार करे गए हे। मोर मितान के तर्ज म राजस्व अउ ग्रामीण अधिकारी घर-घर पहुंच के उंखर समस्या अउ जरूरत पूछत हें। शिविर के पहिली दिन आज सबो तहसील के ग्रामीण इलाका मन म 15 गांव मन म शिविर आयोजित करे गिस। ए शिविर मन म 1662 ले जादा मनखे मन ह आवेदन दीन। ज्यादातार आवेदन आय, जाति, निवास प्रमाण पत्र ले संबंधित हे। टीम ह ए आवेदन मन म काम शुरू कर देहे हे। बहुत जल्दी तियार करके ओ मन ल गांव पहुंचके जनप्रतिनिधि मन के आगू म ये देहे जाही।
कलेक्टर ह पहिली दिन आज तखतपुर तहसील के ग्राम कंचनपुर पहुंचके शिविर के निरीक्षण करिन। उमन शिविर मन म आए आवेदन मन के प्रकृति के जानकारी लीन। कलेक्टर ह शिविर म आये कुछ किसान मन ले चर्चा करके खेती-किसानी के ताजा हालात जानिन। उमन ग्राम पंचायत कक्ष म बैठका लेके गांव वाले मन के आन जरूरत अउ समस्या मन ल घलोक सुनीन अऊ निराकरण के निर्देश मौजूद अधिकारी मन ल दीन। जिला कार्यालय के भू-अभिलेख शाखा ले मिले जानकारी के मुताबिक शिविर मन ले आज करीबन 1662 आवेदन मिलिस । एमां तखतपुर तहसील ले 265, बेलगहना तहसील ले 55, बिल्हा ले 57, कोटा ले 665, सकरी ले 273, बिलासपुर ले 296 के संग मस्तूरी अउ सीपत तहसील ले घलोक बहुत अकन आवेदन मिले हे। शिविर म 50 किसान मन ल किसान किताब घलोक वितरित करे गीस। तहसीलदार मन के सियानी म अधिकारी मन पहिली घर-घर जाके किसान मन के हाल-चाल जानिन अऊ राजस्व संग आन जरूरत के जानकारी ली। शिविर के प्रति गांव वाले मन म उत्साह देखे गीस। अपन काम मन बर जिहां ओ मन ल ऑफिस के चक्कर लगाय ल परत रहिस तभो काम होए म विलंब हो जात रहिस। राज्य शासन के मंशा के मुताबिक कलेक्टर के ये नवा पहल ले गांव वाले मन म खुशी के झलक देखे गीस।