राज्यपाल ले बस्तर के आदिवासी मन ह मुलाकात करिन

रायपुर, राज्यपाल सुश्री अनुसुईया उइके ले बस्तर के आदिवासी मन ह मुलाकात करिन। आदिवासी मन के ये समूह बस्तर ले पैदल चलत आज राजभवन के दरवाजा पहुंचिन अऊ राज्यपाल ले मिले के इच्छा जताईन। उमन पहिली राजभवन ले कोनो समय नइ ले रहिन, फेर राज्यपाल सुश्री उइके ल ये जानकारी मिलीस त उमन बिना कोनो निरधारित प्रक्रिया के पालन करे, अधिकारी मन ल ओ मन ल राजभवन के भीतर बुलाए के हुकुम दीन अऊ ओ मन ल सम्मानपूर्वक बइठाके उंखर व्यथा सुनिन। प्रतिनिधिमण्डल ह राज्यपाल ल बस्तर संग आन नगर पंचायत मन ल फेर ग्राम पंचायत बनाए के आग्रह करिन। उमन कहिन कि ये नगर पंचायत मन पहिली ग्राम पंचायत रहिस। नगर पंचायत बने ले ओ मन ल असुविधा के सामना करना परत हे। जेखर सेती ओ मन ल फेर ग्राम पंचायत बनाए जाय।
राज्यपाल ह कहिन कि पांचवी अनुसूची के तहत ग्राम पंचायत मन ल नगर पंचायत नइ बनाय जाना चाही। जेन ग्राम पंचायत मन ल नगर पंचायत बनाए गए हे, ऊंखर सबो कानूनी पहलु मन उपर अध्ययन करे जात हे अऊ ओ म नियमानुसार जरूरी कार्यवाही करे जाही। उमन कहिन कि ये समय आदिवासी मन के मुख्य त्यौहार विश्व प्रसिद्ध दशहरा उत्सव के आयोजन करे जात हे। ये बस्तर के सांस्कृतिक पहिचान ये। ये पर्व ल सब मिलजुलके मनावव। ये मां मैं घलोक सामिल होए बर बस्तर आ रवत हंव।
ये बेरा म पूर्व केन्द्रीय मंत्री श्री अरविन्द नेताम, पूर्व सांसद श्री सोहन पोटाई, विधायक श्री शिशुपाल शोरी संग बड़ संख्या म आदिवासी उपस्थित रहिन।