संग्राहक मन ल 71 लाख 82 हजार रूपिया के नकद भुगतान
रायपुर, 20 अप्रैल 2020। कोरोना वायरस के संक्रमण अऊ विश्वव्यापी महामारी के दौर म वनवासी मन कोति ले संग्रहित लघु वनोपज के समुचित खरीदी करे के कमान मुख्यमंत्री श्री भूपेश बघेल ह महिला स्व-सहायता समूह मन ल सौपे हे। महिला स्व-सहायता समूह के सदस्य महिला मन गांव-गांव म वनोपज के खरीदी करत हें अऊ संग्राहक मन ल वनोपज के नकद भुगतान घलोक करत हें, ये काम म ओ मन ल वन अमला के पूरा-पूरा सहयोग मिलत हे। गांव वाले मन ल अब अपन कोति ले संग्रहित वनोपज जइसे- ईमली, महुआ, हर्रा, बेहड़ा, कालमेघ, नागरमोथा, कुल्लू गोंद, धंवई फुल, भेलवा आदि वनोपज ल बेचे बर साप्ताहिक बाजार के अगोरा नइ करना परय, भलुक उंखर जब मन होथे अपन गांव के महिला स्व-सहायता समूह ल वनोपज बेचके वाजिब कीमत प्राप्त करत हें अऊ ये प्रकारसे ओ मन बिचौलिया के चुंगल ले घलोक मुक्त हो गए हें।
पखांजूर तहसील के नक्सल प्रभावित गांव मरोड़ा के ग्रामीण रूसी नवगो ह सरकार के ये व्यवस्था उपर खुशी के ईजहार करत स्थानीय बोली म कहिन के महुआ बेचे बर मोला अब बाजार जाय के जरूरत नइ परय, अपन गांव म ही महिला स्व-सहायता समूह ल सही तौल म महुआ बेचके नकद राशि पा जाथंव, साहब मन ह बताए हें के स्व-सहायता समूह तीर वनोपज बेचे ले भविष्य म मोला बोनस घलोक मिल सकत हे। अइसनहे विचार गांव के महिला बारोबाई नवगो अउ रैजीराम नुरूटी ह घलोक व्यक्त करिन।
जानबा हे के शासन के निर्देश के मुताबिक महिला स्व-सहायता समूह मन गांव मन म वनोपज के खरीदी करत हें। कांकेर जिला के तीनों वनमण्डल कांकेर, पूर्व भानुप्रतापपुर अउर पश्चिम भानुप्रतापपुर ल मिलाके 205 लघु वनोपज सहकारी समिति मन के 10 हजार 985 संग्रहक मन ले अब तक 03 हजार 642 क्विंटल 26 किलोग्राम वनोपज के खरीदी करे गए हे, जेखर बर संग्राहक मन ल 71 लाख 82 हजार 782 रूपिया के नकद भुगतान करे गए हे। जिला वनोपज सहकारी संघ कांकेर अंतर्गत 124 समिति के 4 हजार 454 संग्राहक मन ले 1,510 क्विंटल 53 किलोग्राम वनोपज के खरीदी करे गए हे, जेखर बर 29 लाख 34 हजार 406 रूपिया के नकद भुगतान करे गए हे। पूर्व भानुप्रतापपुर वनमण्डल के 40 समिति मन म 1285 क्विंटल 36 किलोग्राम वनोपज के खरीदी करे गए हे, जेखर बर 02 हजार 984 संग्राहक मन ल 30 लाख 46 हजार 376 रूपिया के भुगतान करे गए हे। अइसनहे पश्चिम भानुप्रतापपुर वनमण्डल के 41 समिति मन म 846 क्विंटल 37 किलोग्राम वनोपज के खरीदी करे गए हे, एखर बर 03 हजार 547 संग्राहक मन ल 12 लाख 02 हजार रूपिया के नकद भुगतान करे गए हे। एकर आज कांकेर जिला के कलेक्टर श्री के.एल. चौहान, पुलिस अधीक्षक श्री एम.आर. अहीरे अऊ पश्चिम भानुप्रतापपुर के वन मंडलाधिकारी श्री आर.से. मेश्राम ह भ्रमण करके निरीक्षण घलोक करिन। उमन संग्राहक मन ले बातचीत करके ओ मन ल महिला स्व-सहायता समूह मन तीर ही वनोपज बेचे के समझाईश दीन।