विशेष पिछड़ी जनजाति के कमार बसाहट मन म जनमन योजना ले पहुंचिस जलधार

7 हजार ले जादा कमार मनखे मन ल मिलीस घर पहुंच पानी के सुविधा
वनोपज संग्रहण के संग घर के बाड़ी म लगावत हें साग-सब्जी
धमतरी , 21 मई 2025। मुख्यमंत्री श्री विष्णु देव साय के अगुवई म छत्तीसगढ़ म केंद्रीय योजना मन के प्रभावी क्रियान्वयन करे जात हे। एमां ले एक प्रधानमंत्री जनमन योजना के तहत धमतरी जिला के दूरस्थ वनांचल क्षेत्र म बसे विशेष पिछड़ी जनजाति के कमार परिवार मन ल अब साफ पेयजल उपलब्‍ध होवत हे।
धमतरी जिला म सुदूर वनांचल अऊ घने जंगल म बसइया विशेष पिछड़ी जनजाति कमार मन के 92 ग्राम पंचायत के 118 गांव मन के 130 बसाहट म एक हजार 981 परिवार निवासरत हे। इहां रहइया मनखे मन ल पीए बर साफ पानी के व्यवस्था अपन घर ले दूरिहा जंगल, तालाब या पोखर मन ले करना परत रहिस। कई बसाहट पानी बर जंगल म बोहइया मौसमी नदी-नाला मन म निर्भर रहिस। पानी बर बहुत दूर तक जाय म लगइया शारीरिक श्रम, गर्मी-बरसात-ठंड के मौसम म होवइया असुविधा मन के संगें-संग पोखर-तालाब-नाला मन के अशुद्ध पानी के सेती होवइया बीमारी मन ले घलोक मनखे मन ल जूझना परत रहिस। सुदूर जंगल म पैदल चले ले सांप-बिच्छु मन के संगें-संग जंगली जानवर के हमला के डर घलोक हमेशा लगे रहत रहिस।
प्रधानमंत्री श्री नरेन्द्र मोदी के मंशा मुताबिक विशेष पिछड़ी जनजाति मन ल विकास के मुख्य धारा ले जोड़े अऊ ऊंखर रहवास क्षेत्र ल विकसित करे बर पीएम जनमन अभियान धमतरी जिला म शुरू करे गीस। ए अभियान के तहत विशेष पिछड़ी जनजाति कमार क्षेत्र मन के पूरा विकास करे के योजना तैयार करे गीस। ए कमार बसाहट मन म पीए के साफ पानी घर-घर पहुंचाए बर जल जीवन मिशन के तहत रेट्रोफिटिंग, सिंगल विलेज अउ समूह जल प्रदाय योजना मन ल स्वीकृत करे गीस। योजना मन के अनुसार चुने गए गांव मन म हैण्डपम्प, ट्यूबवेल जइसे जलस्त्रोत बनाय गीस। गांव मन म आरसीसी ओवहरहेड पानी टंकी मन के निर्माण करे गीस। ए पानी टंकी मन ले बसाहट के हर घर म पाईप लाईन बिछाके नल कनेक्शन देहे गीस। जेन गांव-बसाहट मन म बिजली के व्यवस्था नइ रहिस, उहां सौर ऊर्जा चलित पम्प लगाके पानी के आपूर्ति घर-घर म लगे नल मन म करे गीस। आज पीएम जनमन योजना के माध्यम ले कमार बसाहट के एक हजार 958 घर म नल ले शुद्ध पानी पहुंचाए जात हे।