शासकीय योजना अऊ नवा तकनीक ले उद्यानिकी क्षेत्र म किसान मन ल मिलत हे बड़का लाभ

रायपुर, उद्यानिकी के क्षेत्र म शासकीय योजना अऊ नवा तकनीक के संगम ले सब्जी उत्पादक अऊ किसान मन ल बड़का लाभ मिलत हे। कृषि उपकरण मन बर आसान मदद अऊ नवा तकनीक बर शासकीय विभाग मन ले मिलत मार्गदर्शन ले किसान बेहतर सब्जी उत्पादन म हाथ आजमावत हें।
अइसनेच सब्जी उत्पादक श्री कृष्ण दत्त बताथे कि ओ ह पहिली 5 एकड़ सिंचित रकबा म धान अऊ मक्का के खेती करत रहिस। जुन्ना तकनीकी के उपयोग ले कृषि म थोड़-बहुत आमदनी हो पात रहिस। ओ ह आगू बताथे कि जइसनहेच उद्यानिकी विभाग कोति ले राष्ट्रीय बागवानी मिशन योजना के बारे म जानकारी मिलीस त तुरंत वो ह विभाग ले सम्पर्क करिस।
कोरिया जिला के विकासखण्ड बैकुण्ठपुर के महोरा गांव के कृष्णदत्त ल विभाग कोति ले टपक सिंचाई योजना के लाभ साल 2019-20 म मिलीस। करीबन 1.29 लाख के लागत ले 2.5 एकड़ ले शुरुआत करिस। ये जमीन म ड्रीप लगवइस जेमे 70 प्रतिशत विभागीय अनुदान अऊ 30 प्रतिशत कृषक शेयर मिलिस।
कृष्ण दत्त बताथे कि ये नवा तकनीक के उपयोग करके खेत मन म मैं ह उद्यानिकी फसल जइसे गोभी, मिर्च, बैंगन, टमाटर, कददू, पपीता लगाए हंव। जेखर से 1 साल म मोला 8 ले 10 लाख रुपिया के लाभ होवत हे। एखर संगेच ओ ल विभाग कोति ले पैक हाउस योजना, शेड नेट योजना, पावर वीडर योजना अऊ डीबीटी योजना के घलोक लाभ मिलत हे।
ड्रिप सिंचाई प्रणाली ले सिंचाई ले प्राप्त लाभ ले कृष्णदत्त बहुत खुश हे। ड्रिप सिंचाई प्रणाली ले पौधा मन के सिंचाई होए म पौधा मन ल संतुलित मात्रा म पानी मिलत हे। टपक (ड्रिप) सिंचाई प्रणाली अइसन पद्धति हे जेखर ले कृषक अपन खेत, बाड़ी के आसानी ले सिंचाई कर सकत हे। ये पद्धति ले पौधा मन ल उंखर आवश्यकतानुसार पानी ल बूंद-बूंद के रूप म पौधा के जर म देहे जाथे।