- जागरूक अऊ सशक्त समाज निर्माण म शिक्षक मन के महत्वपूर्ण भूमिका: मुख्यमंत्री श्री बघेल
- नरवा-गरूवा-घुरवा-बाड़ी बर जागरूकता लाए म शिक्षक मन के घलोक सक्रिय भागीदारी
रायपुर, मुख्यमंत्री श्री भूपेश बघेल ह कहिन कि जागरूक अऊ सशक्त समाज के निर्माण म शिक्षक मन के महत्वपूर्ण भूमिका हे। शिक्षक हमार समाज के रीढ़ ये। ओ मन हमार भविष्य के निर्माण करत हें। शिक्षक हमर प्रेरणा के स्त्रोत होथें जऊन हमर जीवन म अवइया बहुत अकन बाधा मन के सफलतापूर्वक सामना करे बर तियार करथें। मुख्यमंत्री आज दुर्ग जिला के पाटन विकासखण्ड के ग्राम पंचायत घुघुवा (क) म शासकीय उच्चतर माध्यमिक शाला प्रांगण म आयोजित शिक्षक सम्मान समारोह ल सम्बोधित करत रहिन। उमन समारोह म जिला म शिक्षा के क्षेत्र म काम करईया 35 शिक्षक मन ल सम्मानित करिन।
मुख्यमंत्री श्री बघेल ह ये बेरा म सम्बोधित करत कहिन कि शिक्षक के स्थान अड़बड़ ऊंचा हे। अभिभावक लइका ल जन्म देथे फेर शिक्षक उंखर चरित्र ल आकार देके उज्जवल भविष्य के निर्माण करथें। राष्ट्रनिर्माण म शिक्षक के अड़बड़ेच महत्वपूर्ण भूमिका रहिथे। उमन डॉ. सर्वपल्ली राधाकृष्णन के संबंध म कहिन कि अपन त्याग अऊ समर्पण के संग काम करत ओ मन राष्ट्रपति बनिन फेर उंखर हार्दिक इच्छा रहिस कि ओ मन ल शिक्षक के रूप म ही सुरता करे जाए, ए खातिर ऊंखर जन्म दिवस ल शिक्षक दिवस के रूप म मनाये जाथे।
मुख्यमंत्री श्री बघेल ह कहिन कि सार्वजनिक हित के काम मन म संसाधन मन के कोनो कमी नइ आन दीए जाए। उमन नरवा-गरूवा-घुरवा-बाड़ी योजना के संबंध म विस्तार ले जानकारी देवत योजना के महत्व ले अवगत कराइन। उमन कहिन कि ग्रामीण अर्थव्यवस्था ल सुदृढ़ करे म ये योजना के महत्वपूर्ण भूमिका हे। उमन शिक्षक मन ल घलोक नरवा-गरूवा-घुरवा-बाड़ी योजना के संबंध म मनखे मन ल जागरूक करे अऊ योजना के क्रियान्वयन म अपन सक्रिय सहभागिता सुनिश्चित करे बर प्रेरित करिन। उमन कहिन कि राज्य के प्रमुख समस्या कुपोषण ल दूर करे बर शासन कोति ले 2 अकटूबर ले विशेष अभियान चलाय जाही।
ये बेरा म दुर्ग संभागायुक्त श्री दिलीप वासनीकर, कलेक्टर श्री अंकित आनंद, रविशंकर विश्वविद्यालय के भूतपूर्व कुलपति श्री एसके पाण्डेय संग आन अधिकारी-कर्मचारी व बड़ संख्या म गणमान्य नागरिक उपस्थित रहिन।
