रायपुर, 22 जनवरी 2024। छत्तीसगढ़ के जांजगीर-चाम्पा जिला ले भगवान राम के बहुत करीब ले नाता हे। इहां प्रभु श्रीराम ह वनवास के जादा समय बिताए हे, मान्यता हे इहां प्रभु श्री राम ह शबरी के जूठा बोइर खाए रहिन। इहां एक पेड़ अइसन हे जेखर पाना ह दोना जइसे हे, माता शबरी ह इही दोना म राम लक्ष्मण ल बोइर रख के खवाए रहिन, ए वट वृक्ष के वरनन सबो युग म मिले के सेती एला अक्षय वट वृक्ष के नाम ले जाने जाथे।
जांजगीर-चांपा जिला के धार्मिक नगरी शिवरीनारायण ल गुप्त प्रयाग कहे जाथे। इहां तीन नदी, महानदी, शिवनाथ अऊ जोक नदी के त्रिवेणी संगम हे। शिवरीनारायण के नाम माता शबरी अऊ नारायण के अटूट स्नेह के सेती परे हे अऊ भक्त के नाम नारायण के आगू रखे गे हे। बड़े मंदिर यानी नर नारायण मंदिर के पुजारी प्रसन्न जीत तिवारी ह बताइस कि शिवरीनारायण ल छत्तीसगढ़ के जगन्नाथपुरी के नाम ले जाने जाथे। मान्यता हे कि इही स्थान म प्राचीन समय म भगवान जगन्नाथ स्वामी के असली स्थान शिवरीनारायण रहीस। आजो साल म एक दिन माघी पूर्णिमा म भगवान जगन्नाथ शिवरीनारायण आथे, इहां मंदिर म रोहिणी कुण्ड हे जेखर जल कभू कम नइ होवय, भगवान नर नारायण के चरण कुंड म जल हमेशा अभिषेक करथे।
शिवरीनारायण ले भगवान राम के जुन्ना नाता, इहें श्रीराम ह माता शबरी के जूठा बोइर खाइन
