अम्बिकापुर, छत्तीसगढ शासन के पंचायत अउ ग्रामीण विकास, लोक स्वास्थ्य अउ कुटुंब कल्याण, चिकित्सा शिक्षा, योजना, आर्थिक अउ सांख्यिकी, बीस सूत्रीय, वाणिज्यिक कर , जी.एस.टी. मंत्री श्री टी.एस.सिंहदेव ह काली सरगुजा जिला अंतर्गत उदयपुर जनपद के सरहदी अउ विधायक आदर्श ग्राम बकोई म आयोजित कार्यक्रम ल संबोधित करत कहिन कि हमर सरकार से घोषणा पत्र के मुताबिक सबो परिवार ल रियायती दर म राशन देहे बर कार्यवाही चालू कर दे गए हे। नवा राशन कार्ड बनाए के काम घलोक लउहे चालू करे जाही।
पंचायत मंत्री श्री सिंहदेव ह कहिन के गरीबी रेखा ले नीचे जीवन यापन करइया परिवार ल तो पहिली जइसे 1 रुपिया किलो चांउर मिलहिच जऊन इनकम टैक्स के दायरा म हे, उमन ल 10 रुपिया किलो मिलही। हमर सरकार रियायती दर म प्रदेश के जम्मो जनता ल राशन देही। उमन कहिन कि बकोई ग्राम म सड़क के काम जल्दी पूरा होवइया हे। एखर से कोरबा जाय बर आवागमन के सुविधा घलोक मिलही। ग्राम म सौर ऊर्जा संचालित बिजली सुविधा के बिवस्था करे गए हे, फेर बरसात म बिजली के समस्या ल दूर करे बर बिजली विभाग ले स्थाई ट्रान्सफार्मर लगाय म घलोक विचार करे जाही। उमन कहिन कि बकोई ग्राम पहाड़ी अउ जादा ऊँचाई म होए के सेती बोरिंग ले पानी के समस्या के समाधान नइ होवत हे। इहां पेयजल के स्थायी निदान बर स्टॉप डेम बनाके वाटर ट्रीटमेंट प्लांट लगाय के प्रस्ताव तैयार करे के कार्यवाही जल संसाधन अउ लोक स्वास्थ्य यांत्रिकी विभाग के अधिकारी मन ल करे ल कहे गए हे।