- उमंग अऊ उत्साह के संग मनाये गीस हरेली तिहार
- कोसमनारा म गौठान के होइस लोकार्पण
रायगढ़, कृषि अऊ जैव प्रौद्योगिकी, संसदीय कार्य, जल संसाधन, पशुपालन अऊ आयाकट विभाग अऊ जिला के प्रभारी मंत्री श्री रविन्द्र चौबे ह आज ग्राम कोसमनारा म आयोजित हरेली तिहार महोत्सव म सामिल होइन। ये बेरा म उमन गौठान के लोकार्पण घलोक करिन। ये बेरा म उहां पारंपरिक करमा नृत्य करत कृषि मंत्री के आत्मीय स्वागत करे गीस। उंखर अगवानी गेड़ी चढ़े युवक मन करिन। उमंग अऊ उत्साह के संग गांव म ग्रामवासी मन ह हरेली के पर्व मनाइन। पर्व म ग्रामीण संस्कृति के अनोखा छटा दिखिस।
कार्यक्रम ल संबोधित करत कृषि मंत्री श्री रविन्द्र चौबे ह सबो ल हरेली पर्व के बधाई अऊ शुभकामना दीन। उमन कहिन कि छत्तीसगढ़ म सरकार कोति ले ये हमार जुन्ना तिहार, कला, संस्कृति, कलेवर सबो ल फेर जगाए गए हे। हरेली तिहार के अवसर म गौधन अऊ कृषि यंत्र मन के पूजा करे जाथे। फुगड़ी, गीत-संगीत अऊ स्थानीय व्यंजन के संग गांव के परंपरा के मुताबिक पर्व मनाये जाथे, ये पईत शासन स्वयं हरेली तिहार मनावत हे। उमन कहिन कि फुगड़ी जइसे गांव के खेल धीरे-धीरे विलुप्त होत जात हे, ये एक किसिम के बड़े योग ये। गेड़ी दौड़ म संतुलन बनाके चलना होथे। उमन कहिन कि शासन के चार चिन्हारी नरवा, गरूवा, घुरवा अऊ बाड़ी योजना ले गांव मन म गौठान के व्यवस्था करे गए हे। जिहां गाय मन बर पानी के व्यवस्था अऊ चारागाह के व्यवस्था करे जात हे। शासन के मंशा हे कि गांव के विकास करना हे अऊ एखर बर गांव के रद्दा म ही चलना होही।