सिरिफ दू दिन म बनिस निवास प्रमाण पत्र

ऋषभ अऊ आदर्श सेना म भर्ती बर कर सकहीं आवेदन

जशपुरनगर, प्रदेश के मुखिया के बागडोर संभाले के बाद श्री भूपेश बघेल ह शासकीय काम-काज म पारदर्शिता अऊ कसावट के संगेच जनसामान्य ल शासन कोति ले मिलइया सेवा मन के लाभ समय-सीमा म सुनिश्चित करे के कड़ा निर्देश अधिकारी मन ल दीए रहिन। मुख्यमंत्री श्री भूपेश बघेल के काम-काज के तौर तरीका अऊ ऊंखर लहजा के असर शासकीय अमला के कार्यशैली म दिखे लगे हे। जनसामान्य ले जुड़े सेवा मन के निपटारा के आलम अब ये हे कि अधिकारी कर्मचारी निरधारित समय-सीमा के अगोरा नइ करत हें। इही कारन हे कि कभू दुर्लभ होवइया जाति अऊ निवास जइसे प्रमाण-पत्र अब दू दिन म बनके मिले लगे हे।

जशपुर नगर के दरबारी टोली के रहइया ऋषभ दूबे अऊ आदर्श दूबे ल सिरिफ दू दिन के भीतर निवास प्रमाण पत्र लोकसेवा केन्द्र ले आके ले जाय के संदेशा मोबाईल म मिलीस, त ऊंमन ल अचरज होगे। ऋषभ ह बताइस कि ऑनलाईन आवेदन जमा करत समय 15 दिन म प्रमाण-पत्र बने के बात कहे गए रहिस। हम आप ल बता देवन कि जाति अऊ निवास प्रमाण-पत्र बर लोकसेवा गारंटी अधिनियम के तहत् समय-सीमा 15 दिन निरधारित हे। ऋषभ दूबे ह दू दिन म निवास प्रमाण-पत्र मिल जाय म प्रसन्नता जाहिर करत कहिन कि ओला अऊ ओखर भाई ल सेना म भर्ती बर आवेदन देवत समय निवास प्रमाण पत्र के जरूरत रहिस। एखर बर 23 मई के दिन ओ ह अऊ ओखर भाई ह जरूरी कागद अउ शपथ पत्र के संग आवेदन दे रहिस। जेखर आधार म 25 मई के दिन उन दुनों भाई मन के निवास प्रमाण पत्र जारी कर दे गए हे।
लोकसेवा गारंटी अधिनियम के तहत् जशपुर जिला म संचालित कुल 9 लोक सेवा केन्द्र मन के माध्यम ले अब तक 42909 असली निवास प्रमाण पत्र जारी करे गए हे।