सुकमा: जिला म लक्ष्य ले जादा होइस मोतियाबिंद ऑपरेशन

सुकमा, 16 मार्च 2024। शासन-प्रशासन के सरलग उदीम ले जिला म स्वास्थ्य सुविधा मन म विस्तार होवत हे,संगेच दूरस्थ ईलाका के मनखे मन ल स्वास्थ्य सेवा प्रदान करे बर संवेदनशीलता ले पहल करे जात हे। कलेक्टर श्री हरिस एस. के निर्देशन अऊ मुख्य चिकित्सा अउ स्वास्थ्य अधिकारी डॉ. महेश सांडिया अउ सिविल सर्जन डॉ.अभय सिंह तोमर के मार्गदर्शन म राष्ट्रीय अंधत्व निवारण कार्यक्रम के अंतर्गत लक्ष्य ले जादा मोतियाबिंद ऑपरेशन करके मरीज मन ल लाभान्वित करे गीस। जिला अस्पताल सुकमा म मोतियाबिंद के सफल ऑपरेशन करे गीस,जेखर से दूरस्थ ईलाका के मरीज मन के जीवन म उजियारा आए हे।
जिला म मोतियाबिंद के सफल ऑपरेशन बर नेत्र विशेषज्ञ डॉ सरिता थॉमस, नेत्र विशेषज्ञ डॉ अर्चना अय्यर, नेत्र विशेषज्ञ डॉ अक्षय पाराशर, ओटी सहायक श्री हनुमंत कन्नूर अऊ श्री अमृत के संयुक्त टीम ह सक्रिय भूमिका निभाके निरधारित लक्ष्य ल प्राप्त करे गए हे। उहें जिला अस्पताल सुकमा म लक्ष्य के विरुद्ध जादा सफलता हासिल करे म डॉ भीमा बारसे नोडल अधिकारी, श्री अमित हलधर सहायक नोडल अधिकारी संग श्री पीयूष साहू , श्री चंद्र प्रकाश साहू, कुमारी विभा साहू, श्री मानसिंह साहू, श्री कार्तिकेश्वर डडसेना, श्री आकाश देशमुख, श्री सचिन वैद्य अऊ आन पैरामेडिकल स्टॉफ के सराहनीय सहयोग रहिस।
मुख्य चिकित्सा अउ स्वास्थ्य अधिकारी डॉ. महेश सांडिया ह बताइस कि कलेक्टर श्री हरिस एस. के सार्थक उदीम ले ओ लक्ष्य के प्राप्ति होए हे। उमन बताइस कि सुकमा जिला बने के बाद जिला अस्पताल म स्थाई डाक्टर नइ होए के बावजूद घलोक सबो चुनौती के सामना करत पहिली बार लक्ष्य ले जादा ऑपरेशन करे गए हे। ए दिशा म स्वास्थ्य विभाग ल जिला प्रशासन के आन विभाग मन से घलोक सहयोग प्रदान करे गीस।