- पेण्ड्रा विकासखंड के करीब 10 हजार लइका आज ले होही लाभान्वित
- पौष्टिक नाश्ता मिले ले लइका पढ़ाई म लगाहीं पूरा मन : श्री टेकाम
बिलासपुर, स्कूल शिक्षा, सहकारिता, पिछड़ा वर्ग, अल्पसंख्यक विकास, आदिवासी अऊ अनुसूचित जाति विभाग के मंत्री डॉ.प्रेमसाय सिंह टेकाम ह आज बिलासपुर जिला के पेण्ड्रा विकासखंड के ग्राम नवागांव म प्रोटीनयुक्त स्वादिष्ट नास्ता योजना के शुभारंभ करिस। ये योजना ले पेण्ड्रा विकासखंड के माध्यमिक अऊ प्राथमिक शाला मन के करीब दस हजार लइका मन ल लाभ होही।
पेण्ड्रा विकासखंड के ये योजना पायलट प्रोजेक्ट के रूप म शुरू करे गए हे। योजना के सफल क्रियान्वयन होए म एला पूरा राज्य म लागू करे जाही। ग्रामीण, विशेषकर जनजाति बहुल क्षेत्र के लइका भिनसरहा स्कूल जाथें तब ओ मन थोकुन खा के जाथें। मध्यान्ह भोजन ओ मन ल मंझनिया डेढ़ बजे मिल पाथें। ते सेती ओ मन भूखा जाथें। तेकर सेती ये योजना चालू करे गए हे। ताकि ओ मन एकाग्रचित्त होके पढ़ाई म ध्यान केन्द्रित करके मन लगाके पढ़ाई कर सकंय, ये बात ल ध्यान म रखत छत्तीसगढ़ सरकार कोति ले पायलट प्रोजेक्ट के रूप म बिलासपुर जिला के पेण्ड्रा अऊ कोरिया जिला के खडगवां विकासखंड के माध्यमिक, प्राथमिक शाला मन के लइका मन ल रोजेच प्रोटीनयुक्त ब्रेकफास्ट देहे के निर्णय लेहे गए हे। ये योजना के तहत ए दुनों विकासखंड के स्कूली लइका मन ल प्रार्थना के बाद नाश्ता मिलही। नाश्ता छत्तीसगढ़ बीज अऊ कृषि विकास निगम कोति ले तियार करे जाही। नाश्ता म जादा प्रोटीनयुक्त सोया क्रंच, चिवड़ा, हलवा सोया बिस्किट आदि दे जाही।
