स्वास्थ्य विभाग के बर्खास्त 05 हजार कर्मी होइन बहाल अऊ 25 हजार कर्मी मन ल मिलीस रूके वेतन

रायपुर, 15 फरवरी 2024। स्वास्थ्य विभाग के अधिकारी-कर्मचारी 21 अगस्त 2023 ले 12 सितमबर 2023 तक हड़ताल म रहिन। ए अवधि के अवकाश अउ रूके वेतन स्वास्थ्य मंत्री श्री श्याम बिहारी जायसवाल के निर्देश म जारी कर दे गए हे। एकर लाभ प्रदेश के लगभग 30 हजार स्वास्थ्य कर्मी मन ल मिलीस। छत्तीसगढ़ स्वास्थ्य फेडरेशन ह स्वास्थ्य मंत्री श्री जायसवाल के आभार व्यक्त करिस।
जानबा हे कि छत्तीसगढ़ स्वास्थ्य फेडरेशन के आंदोलन करत कर्मचारी मन के ओ बंेरा म कार्यालय म अनुपस्थित रहे के सेती बर्खास्तगी अउ वेतन अस्वीकृत कर दे गए रहिस। फेडरेशन के पदाधिकारी मन ह ए संबंध म स्वास्थ्य मंत्री ले मुलाकात करे रहिस। स्वास्थ्य मंत्री श्री जायसवाल ह मुलाकात के बाद स्वास्थ्य महकमा के अधिकारी मन ल ए विसंगति मन ल दूर करे के निर्देश दे रहिन।
निर्देश के परिपालन म बर्खास्त पांच हजार कर्मचारी मन ल वापस सेवा म ले ले गीस। संगेच 25 हजार कर्मचारी मन के अंदोलन के समय रूके वेतन घलोक स्वीकृत कर दे गीस। छत्तीसगढ़ स्वास्थ्य फेडरेशन ह स्वास्थ्य मंत्री श्री जायसवाल के निज निवास कार्यालय म पाछू दिनन सौजन्य भेंट करके धन्यवाद दीस।
आंदोलन के समय चिकित्सा शिक्षा विभाग के दू हजार कर्मचारियों के रूके वेतन ल देहे के आदेश जारी नइ करे गए हे। फेडरेशन के पदाधिकारी मन ह ए कर्मि मन के घलोक वेतन जारी करे के निवेदन स्वास्थ्य मंत्री श्री जायसवाल ले करे हें।