- नेवरा म करहीं 26 गौठान मन के लोकार्पण अउ छत्तीसगढ़ी पारंपरिक खेल अऊ कलेवा के लुत्फ उठाहीं मुख्यमंत्री
- गनियारी म मुख्यमंत्री करहीं प्रदेश के पहिली ‘आजीविका अंगना’ के उद्घाटन
रायपुर, मुख्यमंत्री श्री भूपेश बघेल बिलासपुर जिला के तखतपुर ब्लॉक के गनियारी म प्रदेश के पहिली आजीविका अंगना (मल्टी एक्टिविटी सेंटर) के उद्घाटन एक अगस्त के दिन करहीं। एखर संगेच मुख्यमंत्री नेवरा स्थित गौठान म नवनिर्मित 26 गौठान मन के लोकार्पण घलोक करहीं। ओ मन नेवरा स्थित गौठान म हरेली तिहार मनाहीं। ये बेरा म ओ मन कृषि यंत्र मन के पूजन, पारंपरिक पत्ता बांधना, गाय के पूजा करके कलेवा खवाहीं। श्री बघेल नेवरा म सभा ल संबोधित घलोक करहीं।
पारंपरिक खेल अऊ व्यंजन घलोक – श्री बघेल छत्तीसगढ़ी पारंपरिक खेल जइसे गेंड़ी, नारियल फेंक, कबड्डी आदि कार्यक्रम के अवलोकन करहीं संगेच छत्तीसगढ़ी कलेवा जइसे फरा, चीला, ठेठरी, खुर्मी, पपची के लुत्फ उठाहीं।
मुख्यमंत्री श्री भूपेश बघेल एक अगस्त के दिन हरेली तिहार के अवसर म बिलासपुर जिला म आवत हें। ये बेरा म ओ मन ग्राम गनियारी स्थित प्रदेश के पहिली आजीविका अंगना (मल्टी एक्टिविटी सेंटर) के उद्घाटन करहीं। इहां ओ मन ग्रामीण औद्योगिक परिसर म बॉयोगैस संयत्र के लोकार्पण घलोक करहीं। ये संस्थान गनियारी म गौठान परिसर म बनाय गए हे। जेमां मिनी राईस मिल, तेल मिल, बॉयो गैस संयत्र अऊ आन संयत्र स्थापित करे गए हे।
गनियारी स्थित ‘आजीविका अंगना’ ढाई एकड़ क्षेत्र म फैले हे, जेकर लागत करीबन 3 करोड़ 68 लाख हे। इहां म ओ मन डोम के भीतर सिलाई मशीन प्रशिक्षण, गणवेश निर्माण, जूट बैग निर्माण, अगरबत्ती निर्माण, एलईडी बल्ब निर्माण, कांच के चूड़ी निर्माण, सेनेटरी पैड निर्माण के अवलोकन करहीं। श्री बघेल ई रिक्शा म बइठके डोम के बाहिर संचालित गतिविधि मन के अवलोकन करहीं। डोम के बाहिर महिला मन कोति ले पेवर ब्लॉक, फ्लाई एश ब्रिक्स निर्माण, सीमेंट पोल निर्माण अऊ चैन संकरी, फैंसिंग निर्माण करत हें।
रिकॉर्ड समय म बनके तियार- आजीविका अंगना (मल्टी एक्टिविटी सेंटर) के निर्माण काम अगस्त 2018 म शुरू करे गीस। ये सेंटर रिकॉर्ड समय म एक साल म ही बनके तियार हो गए हे। आजीविका अंगना ल काम के हिसाब ले दू भाग म बांटे गए हे। डोम के भीतरी के अऊ डोम के बाहिर अलग अलग गतिविधि मन म महिला मन कई ठन उत्पाद मन के निर्माण करत हें।
महिला मन होवत हें आर्थिक रूप ले मजबूत- गनियारी मल्टी एक्टिविटी सेंटर म महिला मन स्व सहायता समूह मन के माध्यम ले आर्थिक रूप ले मजबूत होवत हे। अंदर के अऊ बाहिर के गतिविधि मन म करीबन 650 महिला मन काम करत हें। समूह के महिला मन कोति ले पाछू बीस दिन म करीबन 57 लाख रूपिया ले जादा के उत्पादन के विक्रय करे जा चुके हे। जेमां ले महिला मन ल 20 लाख ले जादा के लाभांश मिले हे।
महिला मन ल मिलत हे 5 रूपिया म भरपेट भोजन- आजीविका अंगना म अवइया महिला मन ल घर ले खाना लाके आए के चिंता नइ करना परत हे। ओ मन ल इही परिसर म श्रमिक अन्न सहायता केंद्र म मात्र 5 रूपिया म भोजन प्राप्त होवत हे।
मुख्यमंत्री करहीं सामान वितरण– गनियारी म मुख्यमंत्री श्री भूपेश बघेल दो सौ महिला मन ल सुरक्षा उपकरण, सौ महिला मन ल सिलाई मशीन वितरण, सौ महिला मन ल सायकिल वितरण अऊ पांच महिला मन ल ई रिक्शा के वितरण करहीं।
