अम्बिकापुर। उदयपुर विकासखंड म रविवार के बेमौसम बरसात अउ ओलावृष्टि ह जबरदस्त तबाही मचाये हे. ओलावृष्टि ले सड़क अउ खेत मन म जमें बर्फ के मोटा परत ले किसान मन ल फसल म भारी नुकसान उठाना पड़े हे. उंखर मन के आगु ये क्षति ले उबरे के संकट खड़े होगे हे.
रविवार के मंझनिया लगभग 2 बजे के आसपास मौसम म बदलाव शुरू होइस. आंधी-तूफान के बाद बारिश फिर ओलावृष्टि ले कई घर मन के सीट उड़गे. वहीं दुकान मन के बोर्ड घलो क्षतिग्रस्त होइस. किसान मन ल भी नुकसान उठाना पड़े हे. जोन किसान मन गेहूं लगाये हे.वो मन ल काफी नुकसान उठाना पड़े हे. ऐखर अलावा टमाटर मटर गोभी आदि फसल मन ल भी काफी नुकसान होय हे.
प्रभावित किसान मन प्रशासन ले फसल नुकसान के मुआवजा दिए जाए के मांग करे हे.पुटा, रामनगर, लक्ष्मणगढ़, उदयपुर सहित दर्जनों ग्राम मन म होय तबाही के नजारा तस्वीर ले देखके समझे जा सकत हे. बेमौसम बरसात अउ ओलावृष्टि ह मौसम के मिजाज बदल दिस. जानकार मन के मानना हे कि बेमौसम बरसात अउ ओलावृष्टि ले जाड़ वापस लहुट के आही.
अंबिकापुर म दिखिस शिमला के नजारा, ओलावृष्टि ले सड़क अउ खेत मन म जमिस बर्फ के मोटा परत, किसान फसल नुकसान ल लेके चिंता म।
