धोती-कुर्ता पहिरे मुड़ म साफा बांधके चलाइन ट्रैक्टर
रायपुर, अक्ती तिहार के मौका म मुख्यमंत्री श्री भूपेश बघेल अपन हाव-भाव अऊ पहिरावा ले पूरा किसान के रूप म नजर आइन। कृषि अभियांत्रिकी महाविद्यालय म आयोजित माटी पूजन के कार्यक्रम म ओ मन धोती-कुर्ता पहिर के पहुंचिन। धूप म खेत म उतरिस अऊ मूड़ म साफा बांधके उमन कल्टीवेटर के संग ट्रैक्टर चलात जोताई करिन।
जानबा हे कि छत्तीसगढ़ के मुख्यमंत्री श्री बघेल अपन सादगीभरे अंदाज बर जाने जाथे। मुख्यमंत्री श्री बघेल कई मंच ले ये वाले बात स्वीकार करे हें कि ओ मन पहिली एक किसान ये। खेती-किसानी के बारीकी मन ल गहिर ले जानथें। ते पाए के किसान मन के चिंता घलोक करथें। अक्ती तिहार के अवसर म कृषि अभियांत्रिकी महाविद्यालय म आयोजित माटी पूजन के कार्यक्रम म ऊंखर भीतर छिपे किसान के आचार-व्यवहार बाहिर निकलत दिखिस। इहां अक्ती तिहार के हर रस्म, परम्परा ल ओ मन उछाह ले निभात दिखिन। कृषि अभियांत्रिकी महाविद्यालय के नवनिर्मित भवन के लोकार्पण करे के बाद जब माटी पूजन के पारी आइस त किसान के रूप म मुख्यमंत्री श्री बघेल सबले पहिली धान के कोठी पहुंचिन। धान के कोठी ल उमन पहिली प्रणाम करिन, मां अन्नपूर्णा ले प्रदेश के समृद्धि के कामना करिन, तब जाके दोना म धान लीन।
