उत्तर बस्तर कांकेर, 06 मार्च 2024। श्री रामलला दर्शन योजना के तहत आज जिला के भानुप्रतापपुर रेल्वे स्टेशन ले आस्था स्पेशल ट्रेन ल सांसद श्री मोहन मंडावी के संग कांकेर विधायक श्री आशाराम नेताम अउ अंतागढ़ विधायक श्री विक्रम उसेंडी ह हरी झंडी देखाके रवाना करिन। सांसद श्री मंडावी ह ए बेरा म सबो श्रद्धालु मन ल श्री रामलला के दर्शन बर हार्दिक शुभकामना दीन। विधायक श्री नेताम ह कहिन कि आज पूरा बस्तर क्षेत्र राममय हो गए हे। उमन प्रधानमंत्री अऊ मुख्यमंत्री ल ए योजना बर बधाई देवत कहिन कि सबो वर्ग के मनखे एकजुट होके अयोध्या म श्री रामलला के दर्शन बर जावत हें। विधायक श्री उसेण्डी ह सबो श्रद्धालु मन ल बधाई देवत कहिन कि आज के दिन ऐतिहासिक दिन हे अऊ सबो ल श्रीरामलला के दर्शन करे के मौका मिलही। ए बेरा म म पूर्व विधायक श्री भोजराम नाग संग आन जनप्रतिनिधिगण उपस्थित रहिन। जानबा हे कि जिला के लगभग 663 श्रद्धालु मन अऊ दर्शनार्थि मन ल आस्था स्पेशल ट्रेन ले प्रभु श्री रामलला के दर्शन करे अयोध्या बर रवाना करे गीस।
जिला के भानुप्रतापपुर रेल्वे स्टेशन ले आस्था स्पेशल ट्रेन ले अयोध्या जवइया श्रद्धालु मन के चेहरा म श्रीरामलला के दर्शन करे के खुशी झलकत रहिस। भानुप्रतापपुर रेल्वे स्टेशन श्री रामलला के जयकारा ले गूंज उठिस। अयोध्या धाम जाय बर ट्रेन म बइठे श्री राजकुमार साहू, श्री गजेन्द्र नाग, श्री रामजीवन रावटे अऊ श्री दीनदयाल सोनी संग सबो श्रद्धालु मन ह प्रधानमंत्री श्री नरेन्द्र मोदी अऊ मुख्यमंत्री श्री विष्णुदेव साय के प्रति आभार व्यक्त करत कहिन कि प्रधानमंत्री अउ मुख्यमंत्री के सेती हम श्री रामलला के दर्शन करे के सौभाग्य मिलत हे।
उत्तर बस्तर कांकेर: प्रभु श्री रामलला के दर्शन करे आस्था स्पेशल ट्रेन ले लगभग 663 श्रद्धालु होइन रवाना
