रायपुर, बीजापुर जिला के धुर नक्सल प्रभावित क्षेत्र बेलनार के उपस्वास्थ्य केन्द्र के ग्रामीण स्वास्थ्य संयोजक सुश्री रानी मंडावी हर साल बरसात के दिन म उफनती इन्द्रावती नदी ल डोंगा ले नहाक के लइका मन अऊ गर्भवती महिला मन ल टीका लगाए जाथें। विषम परिस्थिति मन म अऊ घना जंगल, पहाड़ अउ पथरा वाले रद्दा के बाद घलव ओ ह अपन जिम्मेदारी ल पूरा समर्पण के संग पूरा करत हे। काम बर ये लगन अऊ असाधारण परिस्थिति मन म उत्कृष्ट स्वास्थ्य सेवा बर मुख्यमंत्री श्री भूपेश बघेल ह आज रायपुर के मेडिकल कालेज ऑडिटोरियम ‘कायाकल्प‘ राज्य स्तरीय पुरस्कार वितरण समारोह म सुश्री रानी मंडावी ल पुरस्कृत करिस।
28 साल के रानी मंडावी पाछू 5 बछर ले बेलनार उपस्वास्थ्य केन्द्र म पदस्थ हे। स्वास्थ्य विभाग के नियमित टीकाकरण कार्यक्रम के तहत लइका मन ल अऊ गर्भवती महिला मन ल टीका लगाये ल वो ह बहुत अकन बाधा मन के बाद घलोक पहुंचथे। बरसात के दिन म टीका लगाय जाए बर उफनती इन्द्रावती नदी ल डोंगा ले नहकना रानी बर आम बात हे। धीरे-धीरे अब वो ह डोंगा खेवई घलोक सीख डरे हे। रानी ह बताथे कि बेलनार अऊ तिर-तखार के गांव मन म टीका लगाय बर ओला अक्सर कई किलोमीटर पैदलेच सफर करना परथे। लइका मन अऊ गर्भवती महिला मन ल समय म टीका लग जाय ले ओला बहुत सुकून मिलथे। ऊंखर चेहरा मन म मुस्कान देखके वो अपन तकलीफ मन ल भुला जाथे। ओला ये काम म ऊंखर अस्पताल के साथी मन के घलोक पूरा सहयोग मिलथे।
