रइपुर 3 अगस्त 2021 मंगल। कैंसर पीड़ित श्री गोपी लोधी अपन आर्थिक स्थिति कमजोर होए ले अबड़ परेशान रिहिस। इलाज म लाखों रुपिया खर्चा होए के पीछू लंबा बेरा ले परेशान गोपी लोधी के संबंध म जब मंत्री डॉ शिवकुमार डहरिया ल जानकारी मिलीस त उन मन अपन कोति ले पहल करत कैंसर पीड़ित गोपी लोधी के मदद करे के निर्णय लीन। आखिर म मंत्री के पहल ले कैंसर पीड़ित श्री गोपी लोधी ल मुख्यमंत्री स्वेच्छानुदान कोष ले 1.50 लाख रुपिया के राशि प्राप्त होइस।
आरंग वार्ड क्रमांक 04 लोधी पारा निवासी श्री गोपी लोधी पिता शंकर लाल लोधी कैंसर पीड़ित होए के सेति अबड़े परेशान रहत रिहिसे, जेकर जानकारी आरंग क्षेत्र के विधायक अउ कैबिनेट मंत्री डॉ शिवकुमार डहरिया ल होए म उन मन खुदे उन्कर हाल चाल जानीन अउ आर्थिक सहयोग के आवेदन मंगवाके मुख्यमंत्री स्वेच्छा अनुदान कोष ले 1.5 लाख रुपिया आर्थिक सहयोग दिलाए के अनुशंसा करीन अउ राशि स्वीकृत कराके पीड़ित ल 1.5 लाख रुपिया के चेक बांटिन। डेढ़ लाख रुपिया के चेक पाके पीड़ित परिवार ह मुख्यमंत्री दाउ भूपेश बघेल अउ मंत्री डॉ डहरिया के प्रति आभार व्यक्त करीन।
