कोंटा म मनखे मन ह करिन श्री भूपेश बघेल के पारंपरिक ढंग ले स्वागत

बस्तर, मुख्यमंत्री भूपेश बघेल भेंट-मुलाकात के दूसर चरण म कोटा विधानसभा क्षेत्र म पहुंचिन, ये बेरा म पारंपरिक ढंग ले मुख्यमंत्री के स्वागत अउ अभिनंदन करिन। इहां कोंटा के गर्ल्स हायर सेकंडरी स्कूल म बने अस्थायी हैलीपेड म ऊंखर स्वागत बर भारी जनसमूह मौजूद रहिस, उमन मुख्यमंत्री के मयारू स्वागत करिन। स्वागत के बेरा म मुख्यमंत्री ल छिंद पत्ता ले बने परम्परागत गुलदस्ता भेंट करे गीस। एखर पाछू मुख्यमंत्री ह कोण्टा के सामुदायिक स्वास्थ्य केंद्र के निरीक्षण करिन अऊ सुविधा मन के जानकारी लीन। जानबा हे कि मुख्यमंत्री भूपेश बघेल ह प्रदेश के सबो 90 विधानसभा क्षेत्र मन म भेंट-मुलाकात अभियान के शुरुआत ये महीना के 4 तारीक ले करे हें। भेंट-मुलाकात अभियान के पहिली चरण म मुख्यमंत्री श्री बघेल 4 ले 11 मई तक सरगुजा अंचल के विधानसभा क्षेत्र मन के दौरा करिन। ये दौरान उमन तीन जिला मन के विधानसभा क्षेत्र म जनता के बीच पहुंचके शासकीय योजना मन के क्रियान्वयन अऊ जनता ल मिलत लाभ के बारे म जानकारी लीन। मुख्यमंत्री बघेल ह संपर्क-संवाद-समाधान के ध्येय के संग जिहां आम जनता ले सीधा बात करिन अऊ उंखर समस्या मन ल जानके ओखर जल्दी निराकरण घलोक करिन।