कोरिया: ‘टीचर ऑफ द मन्थ’ म अली ल नवाचारी, शुक्ला ल सक्रियता त कमल ल वैज्ञानिक चेतना बर मिलीस सम्मान

कोरिया, 06मार्च 2024। जिला प्रशासन के शुरू करे गए नवाचार ‘टीचर ऑफ द मन्थ’ म ए पइत चार शिक्षक मन के महत्वपूर्ण काम ल रेखांकित करत कलेक्टर श्री विनय कुमार लंगेह ह कलेक्टरेट कार्यालय के सभाकक्ष म प्रशस्ति पत्र देके सम्मानित करिन। बता देवन के बैकुंठपुर विकासखण्ड के शासकीय प्राथमिक शाला, धौराटिकुरा के शिक्षक श्री अली अहमद ह शाला म अध्ययन- अध्यापन के वातावरण विकसित करे अउ आकर्षक नवाचारी जइसे काम मन म सहभागिता निभाए के काम करे हे।शासकीय कन्या उच्चतर माध्यमिक विद्यालय, चरचा के व्यख्याता कमल डड़सेना ह लइका मन म वैज्ञानिक चेतना लाय अउ वैज्ञानिक दृष्टिकोण के संग तार्किक मन ल विकसित करे के काम करे हे।
सुश्री अर्चना शुक्ला, सोनहत विकासखण्ड के शासकीय उच्चतर माध्यमिक विद्यालय कुशहा म व्यवसायिक शिक्षा ल बढ़ावा देहे के संग अध्धयन के क्षेत्र म सक्रिय योगदान देहे हें। सोनहत विकासखण्ड के शासकीय उच्चतर माध्यमिक शाला, रामगढ़ के हरप्रसाद राजवाड़े ह विद्यालय संचालन के उत्तम व्यवस्था करे हें अउ कुशल मार्गदर्शक घलोक हे। ए चारों अध्यापक मन ल कलेक्टर श्री लंगेह अउ अपर कलेक्टर श्री अरुण मरकाम ह प्रशस्ति पत्र देके सम्मानित करिन।