खेल हमला सिखाथे कि जिंदगी म हार घलोक जरूरी हे-खेल मंत्री श्री टंकराम वर्मा

रायपुर 02 फरवरी 2024। जय जोहार क्लब खरोरा कोति ले आयोजित चार दिन के राज्यस्तरीय फुटबाल प्रतियोगिता के रंग बिरंगा गुब्बारा मन ल अकास म छोड़के खेल अउ युवा कल्याण मंत्री श्री टंकराम वर्मा ह शुभारम्भ करिन। मंत्री श्री वर्मा ह संभाग ले आये सबो खिलाड़ि मन ल प्रेरित करत कहिन कि जीवन मे हमला कभू घबराना नइ हे। खेल हमला सिखाथे कि जिंदगी म हार घलोक जरूरी हे, हार ले हमला अपन कमी के पता चलथे। जइसे खेल म जीत-हार होथे वइसहे जिन्दगी म सफलता अऊ असफलता घलोक होथे। खेल ले प्रेरणा लेना जरूरी हे। खेल अनुशासन सिखाथे। अनुशासन ले टीम भावना के विकास होथे। खेल ले शारीरिक अऊ मानसिक स्वास्थ्य म सुधार होथे। जीवन एक खेल के जइसे हे एला खेलना जरूरी हे।
ए अवसर म उमन क्षेत्र के विकास के संगे-संग खेल मैदान मन ल सर्व सुविधायुक्त अऊ ओपन जिम स्थापित करे बर प्रस्ताव प्रस्तुत करे के बात कहीन।
कार्यक्रम म धरसींवा विधायक पद्मश्री अनुज शर्मा ह कहिन कि राज्यस्तरीय फुटबाल खेल प्रतियोगिता के आयोजन क्षेत्र बर सराहनीय काम हे। खेल के ये आयोजन सिद्ध करथे कि क्षेत्र के युवा सही दिशा म हे। एखर बर उमन आयोजक मन ल बधाई दीन।
ए बेरा म तिल्दा जनपद उपाध्यक्ष श्री टिकेश्वर मनहरे, तिल्दा जनपद सभापति श्री शिवशंकर वर्मा, नगर पंचायत अध्यक्ष श्री अनिल सोनी, जनपद सदस्य श्री सुरेंद्र वर्मा, आन जनप्रतिनिधिगण संग बड़ संख्या म नागरिकगण उपस्थित रहिन।