रायपुर, 19 जनवरी 2024। अयोध्या म रामलला के प्राण प्रतिष्ठा समारोह के शुभ अवसर म राजधानी रायपुर के पुलिस परेड ग्राउंड म 20 जनवरी के संझा 6 बजे संगीतमय प्रस्तुति के माध्यम ले ‘‘गाथा राम मंदिर की‘‘ के आयोजन करे जात हे। कार्यक्रम म मुख्यमंत्री श्री विष्णु देव साय अऊ संस्कृति मंत्री श्री बृजमोहन अग्रवाल सामिल होहीं। आडियो-वीडियो के माध्यम ले ये प्रस्तुति म राम मंदिर के 500 बछर के इतिहास ले जुड़े कई ठन घटना के कथात्मक प्रस्तुति होही।
पूरा देश अऊ दुनियाभर म प्रभु श्री राम के आए के अगोरा होवत हे। सबो ल 22 जनवरी के अगोरा हे, जब अयोध्या म भगवान श्री राम 500 ले जादा बछर के बाद मंदिर म फेर विराजमान होही। राम महोत्सव ल लेके देश भर म कई प्रकर के आयोजन करे जात हे। श्री राम मंदिर के विडियो-आडियो प्रस्तुति गाथा म श्रीराम जन्मभूमि ल मुक्त कराए अऊ अयोध्या म श्रीरामलला के भव्य मंदिर निर्माण तक के गाथा ल सुनाए जाही। ये प्रस्तुति एक लाइव म्यूजिकल बैंड के संग होगी। श्रीराम जन्मभूमि के तपस्या अउ संघर्ष के सत्य गाथा के ए कार्यक्रम म प्रवेश निःशुल्क रहिही। श्रीराम मंदिर के महागाथा ल सुर-संगीत म श्रद्धालु देख अऊ सुन सकहीं।
संस्कृति मंत्री श्री बृजमोहन अग्रवाल ह कहिन कि कार्यक्रम म राम जन्मभूमि के इतिहास ले लेके अयोध्या म बनाए जात भव्य राम मंदिर तक के घटना के संगीतमय प्रस्तुति दे जाही। उमन ए संबंध म आम नागरिक मन ले जादा ले जादा संख्या म ए आयोजन म सामिल होए के अपील करे हें।
