गोधन न्याय योजना ले ग्रामीण महिला मन ल मिलीस स्वावलंबन के राह

रायपुर, ग्रामीण महिला मन अब घरेलू काम के संगें-संग आर्थिक गतिविधि मन म घलोक तेजी ले अपन सहभागिता बढ़ावत हें। गोधन न्याय योजना के अंतर्गत गौठान मन म संचालित आय मूलक गतिविधि मन म ग्रामीण महिला मन आर्थिक सहयोगी के भूमिका निभावत हें। अइसनहे अब ओ मन अपन परिवार के जिम्मेदारी, उंखर भरण पोषण अऊ अपन जीवन स्तर म सुधार लाय म सक्षम होवत हें।
विकासखंड खरसिया के ग्राम पंचायत लोढ़ाझर ये सफलता के साक्षी बनत हे, इहां बिहान के अंतर्गत 2018 म गठित कान्हा महिला स्व-सहायता समूह के महिला मन ह भविष्य ल देखत पहिली खुद अउ समूह के सदस्य मन के आर्थिक सहयोग बर एक निश्चित राशि समूह के खाता म डालना चालू करिन, ताकि बचत राशि के उपयोग करके समूह के आय म बढ़ोतरी अऊ रोजगार गतिविधि मन ल करे जा सकय। ये बीच मुख्यमंत्री श्री भूपेश बघेल के विशेष पहल ले छत्तीसगढ़ म सुराजी गांव योजना अऊ गोधन न्याय योजना के शुरुआत हो गीस, जेमां ग्राम पंचायत लोढ़ाझर म गौठान के निर्माण काम चालू होइस, इहां कान्हा महिला स्व-सहायता समूह ह काम करना शुरू करिस।
गौठान निर्माण म महिला स्वसहायता समूह ल सीपीटी, वृक्षारोपण, खुदाई आदि काम मिलीस। समूह के काम मन के कुशलता ले प्रभावित होके, ओ मन ल गोधन न्याय योजना के तहत गोबर खरीदी अउ वर्मी कम्पोस्ट निर्माण के जिम्मेदारी देहे गीस, एखर बर उंखर ट्रेनिंग घलोक करे गीस, तब ले अब तक कान्हा महिला स्व-सहायता समूह ह वर्मी कम्पोस्ट निर्माण, केंचुआ उत्पादन अउ सब्जी उत्पादन के काम सरलग करे जात हे। महिला मन ल एखर से आर्थिक लाभ मिलत हे अऊ ओ मन अपन परिवार के भरण-पोषण म घलोक ये राशि के उपयोग करत हें।