गौठान मन के संग चारागाह अऊ बारी के घलोक निर्माण
मवेशी मन के बइठे बर पारंपरिक घासफूसयुक्त शेड, पानी अऊ चारा के व्यवस्था
रायपुर, मुख्यमंत्री श्री भूपेश बघेल के नेतृत्व म छत्तीसगढ़ सरकार के ग्रामीण आजीविका संवर्धन के महत्वपूर्ण योजना नरवा, गरूवा, धुरूवा अऊ बाड़ी के तहत बनाए जात गौठान मन म मवेशी मन के जमघट देखे ल मिले लगिस। रायपुर जिला के 97 गांव मन म गौठान मन के निर्माण तेजी ले जारी हे। ये मां जिला के 21 ग्राम पंचायत मन म मॉडल गौठान घलोक बनाए जात हे। कलेक्टर डॉ. बसवराजु एस. अऊ जिला पंचायत के मुख्य कार्यपालन अधिकारी डॉ. गौरव कुमार सिंह ह आज इहां जिला के आरंग विकासखण्ड के ग्राम पंचायत बैहार, बनचरौदा अऊ पारागांव म बनाय गे मॉडल गौठान म पहुंचके उहां मवेशी मन बर पानी, चारा अऊ छइंहा आदि व्यवस्था मन के जायजा लीन।
कलेक्टर डॉ. बसवराजु ह कहिन के मवेशी मन के संख्या के मुताबिक पानी, चारा के बने व्यवस्था सुनिश्चित होवय संगेच मवेशी मन के संख्या के मुताबिक नाडेप ढांका के निर्माण घलोक करे जाए ताकि एखर से जुड़े समूह मन ल एखर ले बेहतर आमदनी मिल सकय। कलेक्टर ह गौठान मन म अवइया सबो मवेशी मन के स्वास्थ्य परीक्षण अऊ जरूरी टीकाकरण करे के निर्देश पशुधन विकास विभाग के अधिकारी मन ल दीन। उमन कहिन के गौठान मन म आमजन के सहयोग ले पैरा के व्यवस्था करे जात हे। गांव म ये सुनिश्चित करे जाए के कोनो पैरा ल जलावय झन भलुक ओला गौठान ल देवव।
हम आप ल बता देवन के ए गौठान मन के निमाण ले जिहां गांव मन म मवेशी मन ल एक डे-केयर सेंटर के लाभ मिले लगे हे उन्हें ये गौठान गांव वाले मन विशेषकर गांव मन के महिला स्व सहायता समूह मन के अजीविका संवर्धन अऊ ओ मन ल आत्मनिर्भर बनाए म बहुतेच महत्वपूर्ण साबित होही। कलेक्टर ह कहिन के गौठान मन के नजदीक पानी के बने उपलब्धता सुनिश्चित हो सकय एखर बर आस-पास के नरवा के संरक्षण घलोक करे जाए संगेच उहां बनाए जात चारागाह म सालभर चारा के उपलब्धता सुनिश्चित हो सकही। गौठान मन म फलदार अऊ छायादार पौधा के रोपण घलोक करे जाए।
जिला पंचायत के मुख्य कार्यपालन अधिकारी डॉ. गौरव कुमार सिंह ह बताइस के पहिली चरण म जिला के 97 ग्राम पंचायत मन म गौठान मन के निर्माण चलत हे। ये मां 21 ग्राम पंचायत मन म मॉडल गौठान बनाए जात हे, 10 मॉडल गौठान पूरा बनके तियार हो गे हे। ग्राम पंचायत बैहार म 5 एकड़ म गौठान बनाये गए हे अऊ 10 एकड़ म चारागाह विकास करे जात हे। ए गौठान म 500 पशु आवत हें। अइसनहे बनचरौदा म 4 एकड़ गौठान अऊ 7 एकड़ म चारागाह अउ पारागांव म 5 एकड़ म गौठान अऊ 10 एकड़ म चारागाह बनाये गए हे। इहां सरलग 650 अऊ 980 मवेशी आवत हे।
उमन बताइस के ए गौठान मन म मवेशी मन के पीये के पानी बर ट्यूबवेल अऊ सोलरपंप लगाए जात हे। अइसनहे ऊंखर बइठे के स्थान म पारंपरिक तरीके ले घासफूस सहित शेड के निर्माण, मवेशी मन बर पैरा के व्यवस्था म गांव वाले मन के सहयोग घलोक ले करे जात हे अऊ गांव वाले मन घलोक बड़ उछाह ले गौठान मन म मवेशी मन बर पैरादान करतय हें। गोबर खाद बर वर्मी बैड के व्यवस्था इहां करे गए हे एखरे संगेच नाडेप टंकी घलोक बनाए जात हे। गौठान मन के संचालन बर राष्ट्रीय ग्रामीण अजीविका मिशन बिहान के महिला स्वसहायता समूह मन ल जोड़े जात हे ताकि वो इहां बनइया खाद अऊ आन आय मूलक गतिविधि मन ले अपन अजीविका के संवर्धन करके अपन आप ल आत्मनिर्भर बना सकंय। मवेशी मन के इहां नियमित रूप ले उपस्थिति बर चरवाहा मन के व्यवस्था घलोक करे गए हे।
