छत्तीसगढ़ के झांकी ‘बस्तर के आदिम जनसंसद : मुरिया दरबार‘ म सामिल लोक-कलाकार मन ह प्रधानमंत्री श्री नरेन्द्र मोदी ले करिन मुलाकात

रायपुर, 27 जनवरी 2024। नई दिल्ली म गणतंत्र दिवस परेड ले पहिली 24 जनवरी के प्रधानमंत्री श्री नरेन्द्र मोदी ह कई ठन प्रदेश मन के झांकी के प्रदर्शन बर राजधानी आए लोक-कलाकार मन ल आमंत्रित करके उंखर से मुलाकात करिन अऊ उंखर हौसला बढ़ाइन। इही बेरा म उमन छत्तीसगढ़ के झांकी ‘‘बस्तर के आदिम जनसंसद: मुरिया दरबार‘‘ म सामिल लोक-कलाकार मन ले घलोक मुलाकात करिन। ए कलाकार मन ल मुख्यमंत्री श्री विष्णु देव साय ह अपन शुभकामना के संग छत्तीसगढ़ ले नई दिल्ली रवाना करे रहिन।
प्रधानमंत्री श्री मोदी ह सबो राज्य मन ले आए महिला कलाकार मन ल सुग्‍घर अउ जीवंत प्रदर्शन बर शुभकामना दीन। प्रधानमंत्री श्री मोदी ह राज्य मन ले नइ दिल्ली पहुंचे एनसीसी अऊ एनएसएस के लइका मन ले घलोक मुलाकात करिन। ए अवसर म केंद्रीय रक्षा मंत्री श्री राजनाथ सिंह, सूचना एंव प्रसारण मंत्री श्री अनुराग ठाकुर, जनजातीय काम मंत्री अर्जुन मुंडा, अउ आन मंत्रिगण मौजूद रहिन।
प्रधानमंत्री श्री नरेन्द्र मोदी ह कलाकार मन ल संबोधित करत कहिन कि ए पइत गणतंत्र दिवस के परेड देश के नारी शक्ति ल समर्पित हे। में आज इहां अतका बड़ संख्या म देश के अलग-अलग हिस्सा ले आए बेटी मन ल देखत हंव। आप मन इहां अकेला नइ आए हव भलुक आप मन अपन संग अपन राज्य के रीति रिवाज अऊ अपन समाज के समृद्ध सोच घलोक लेके आए हव। आज आप मन ले मिलना घलोक एक विशेष अवसर बन गए हे। कड़ाके के ठंड म आप मन ह घना कोहरा के बीच दिन-रात रिहर्सल करे हव अऊ गजब के परफॉर्मेंस दे हव। मोला पक्का विश्वास हे कि जब आप मन इहां ले अपन घर जाहू त आप मन के पास गणतंत्र दिवस के अनुभव के बारे म बताय बर अड़बड़ अकन बात होही अऊ इही तो ए देश के विशेषता हे। विविधता ले भरे हमार देश म सिरिफ एक राज्य ले दूसर राज्य म जाय ले ही जीवन म नवा अनुभव जुड़े लग जाथे।