रायपुर, छत्तीसगढ़ के सरगुजा जिला के मैनपाट म चाय के खेती होही। मैनपाट जनपद के ग्राम ललया म चाय बगान बर पांच एकड़ निजी जमीन के चयन करे गए हे। खाद्य मंत्री श्री अमरजीत भगत ह सनिवार के दिन अधिकारी मन के संग मैनपाट म चाय बगान बर चिन्हित जमीन के जायजा लीन। उमन भू-स्वामी ल चाय के खेती करे बर प्रेरित करिन। श्री भगत ह अधिकारी मन ल चिन्हित चाय बगान म पौधा मन के सुरक्षा बर तार फेंसिंग कराए, चिन्हित जमीन के तीर बोहइया नरवा म सोलर पंप लगाके सिंचाई के व्यवस्था करे के निर्देश दीन।
खाद्य मंत्री श्री भगत ह मैनपाट के हाथी प्रभावित क्षेत्र ग्राम बरीमा के निवासी मन ले मुलाकात करिन अऊ ऊंखर समस्या ले अवगत होइन। उमन अधिकारी मन ल हाई-माॅस्क टार्च देहे अऊ मुआवजा प्रकरण तियार करे के निर्देश दीन। गांव वाले मन ह हाथी मन के आलू के फसल ल नुकसान पहुंचाए म शासन कोति ले निरधारित मुआवजा दर ल बढ़ाए के मांग म श्री भगत ह शासन स्तर म बढ़ाए के संबंध म विचार करे के बात कहिन।
