गांव वाले मन ल मौसमी बीमारी मन ले बचाव बर दिए गीस जानकारी
जगदलपुर, बस्तर जिला म जापानी बुखार, डेंगू अऊ आन मौसमी बीमारी मन के रोकथाम बर स्वास्थ्य विभाग कोति ले सरलग प्रभावित क्षेत्र मन म स्वास्थ्य शिविर के आयोजन करे जात हे। बुधवार के दिन दरभा अऊ लोहण्डीगुड़ा विकासखण्ड के चार गांव मन म स्वास्थ्य शिविर लगाके गांव वाले मन के स्वास्थ्य परीक्षण करे गीस अऊ बुखार पीडि़त मन के खून के जांच के बाद ओ मन ल निःशुल्क दवइ दिए गीस।
मुख्य चिकित्सा अऊ स्वास्थ्य अधिकारी ह बताइस कि दरभा विकासखण्ड के छिन्दावाड़ा, मावलीपदर अऊ बड़े कड़मा म स्वास्थ्य शिविर लगाए गीस। ए शिविर मन म 105 गांव वाले मन के स्वास्थ्य परीक्षण करे गीस। एमां 16 मनखे बुखार ले पीडि़त पाए गीस। एखर संगेच दस्त के 4, सर्दी-खांसी के 12 अऊ आन बीमारी मन के 22 रोगी पाए गीस। ए सबो के निःशुल्क उपचार अऊ दवई दिए गीस। अइसनहे लोहण्डीगुड़ा विकासखण्ड के ग्राम बदरेंगा म घलोक स्वास्थ्य शिविर लगाए गीस। इहां बुखार के 10 मरीज संग कई ठन बीमारी मन के 52 रोगी पाए गीस, जिंकर निःशुल्क उपचार करे गीस।
