रायपुर, मुख्यमंत्री श्री भूपेश बघेल ह आज इहां अपन निवास म आयोजित जन-चौपाल, भेंट-मुलाकात कार्यक्रम म बहुत झन जरूरतमंद मरीज मन ल स्वेच्छानुदान ले आर्थिक सहायता मंजूर करिन। उमन गुंडरदेही विकासखंड के ग्राम जुनवानी निवासी श्री अमृत लाल साहू ल पेट के बीमारी के इलाज बर बीस हजार रूपिया, जशपुर जिला के कांसाबेल विकासखंड के ग्राम देवरी के श्रीमती जोशीमती बाई ल इलाज बर दस हजार रूपिया के सहायता राशि के मंजूरी प्रदान करिन। जोशमती बाई लकवा ले पीड़ित हे।
श्री बघेल ह भिलाई के रिसाली निवासी श्रीमती लक्ष्मी देवी चंद्राकर ल इलाज बर बीस हजार रूपिया के सहायता स्वेच्छानुदान ले स्वीकृत करिन। लक्ष्मी देवी ल कुछ समय पहिली ब्रेन हेमरेज हो गए रहिस। राजनांदगांव जिला के डोंगरगढ़ विकासखंड के ग्राम मेढ़ा के श्री बोहरण देवांगन ह घलोक इलाज बर आर्थिक सहायता के आवेदन मुख्यमंत्री ल दीन, जऊन म उमन दस हजार रूपिया के राशि मंजूर करिन।
रायपुर जुन्ना बस्ती के श्रीमती भुनेश्वरी यादव थैलेसीमिया रोग ले ग्रसित हे मुख्यमंत्री ह ओ ला दस हजार रूपिया के स्वीकृत प्रदान करिन। अइसनहे दुर्ग जिला के पाटन विकासखंड के देवादा के निवासी श्री प्रकाश शर्मा ल प्रोस्टेट के इलाज बर बीस हजार रूपिया के आर्थिक सहायता मुख्यमंत्री ह मंजूर करिन।
मुख्यमंत्री के मदद ले अब आगू पढ़ सकही नेहा
मुख्यमंत्री श्री भूपेश बघेल के मदद ले राजधानी रायपुर के नजदीक धनेली गांव म रहइया नेहा अपन पढ़ाई सरलग रख सकही। 100 प्रतिशत दिव्यांग नेहा बी.कॉम. के पढ़ाई पूरा कर डरे हे। आगू बी.सी.ए. करे बर ओ ह आजेच रावतपुरा कालेज म प्रवेश लीस अऊ अपन पिता श्री प्रमोद वर्मा के संग जन-चौपाल म मुख्यमंत्री ले मिले आईस। मुख्यमंत्री ह स्वेच्छानुदान के रुप म बी.सी. ए. पहिली साल के पढ़ाई बर 22 हजार रूपिया मंजूर करिन। जन-चौपाल म मुख्यमंत्री ले आर्थिक मदद पाके नेहा खुशी-खुशी घर लहुटिस।
मुख्यमंत्री ल दिव्यांग बहिनी मन ह बांधिन धान के राखी
रायपुर, मुख्यमंत्री श्री भूपेश बघेल ल आज इहां ऊंखर निवास कार्यालय म आयोजित जन चौपाल भेट मुलाकात कार्यक्रम म समूह के बहिनी मन ह धान ले बने राखी बांधिन। मुख्यमंत्री ल नवचेतना समूह के सीमा भरतिया अऊ रोशनी समूह के किरण साहू ह बताइस कि ऊंखर समुह कोति ले राखी अऊ ज्वेलरी के निर्माण करे जात हे। समूह तीर दुकान नइ होए के सेती अभी समूह के बहिनी मन घूम-घूम के बेचथें। ओ मन ल समूह के कारोबार बर दुकान के जरूरत हे। ये मा मुख्यमंत्री ह समूह ल दुकान देवाए के भरोसा दीन।
