तीन बछर म 95 हजार 643 सिंचाई पम्प मन ल देहे गीस बिजली कनेक्शन

रायपुर, मुख्यमंत्री श्री भूपेश बघेल के हुकुम के मुताबिक प्रदेश म किसान मन के सिंचाई पम्प ल बिजली कनेक्शन देहे के काम लउहे करे जात हे। पाछू तीन बछर म 95 हजार 643 सिंचाई पम्प ल बिजली कनेक्शन देहे गए हे। एमां ले 60 हजार 197 स्थाई कनेक्शन अऊ 35 हजार 446 अस्थाई बिजली कनेक्शन देहे गए हे।
राज्य सरकार कोति ले कृषि पंप ऊर्जीकरण योजना के अंतर्गत विद्युत लाईन के विस्तार बर प्रति पंप एक लाख रूपिया के अनुदान देहे जात हे। पहिली देहे गए बिजली कनेक्शन मन ल मिलाके अभी हाल म करीबन 5 लाख 81 हजार ले जादा कृषि पंप मन ल स्थाई अउ अस्थाई बिजली कनेक्शन देहे गे हे।
मुख्यमंत्री श्री भूपेश बघेल ह पाछू साल 1 जनवरी के स्थिति म बिजली कनेक्शन बर लंबित 35 हजार 161 कृषि पंप मन ल बिजली कनेक्शन देहे के निर्देश अधिकारी मन ल देहे रहिन। विद्युत वितरण कंपनी ह 30 नवम्बर 2021 तक एमां ले 23 हजार 985 पंप ल कनेक्शन देहे गए हे। बांचे पंप मन ल चालू वित्तीय साल के आखरी तक बिजली कनेक्शन देहे के लक्ष्य निरधारित करे गए हे।
राज्य शासन कोति ले किसान मन ल ऊंखर बिजली बिल म राहत देहे बर कृषक जीवन ज्योति योजना संचालित करे जात हे। ये योजना के तहत 3 हार्स पावर तक के सिंचाई पंप ल बिजली बिल म 6000 यूनिट प्रति साल अऊ 3 ले 5 हार्स पावर तक के कृषि पंप के बिजली बिल म 7500 यूनिट प्रतिवर्ष छूट देहे जात हे। एखर अलावा किसान मन ल फ्लेट रेट म बिजली प्राप्त करे के विकल्प घलोक देहे गए हे।
राज्य शासन ह अनुसूचित जाति अउ अनुसूचित जनजाति के किसान बर विद्युत खपत के कोनो सीमा नइ रखे हे। ए वर्ग के किसान मन ल खेती म उपयोग होवत पूरा बिजली निःशुल्क देहे जात हे। अभी हाल म कृषक जीवन ज्योति योजना ले प्रदेश के 5 लाख 81 हजार किसान लाभान्वित होवत हे।