अम्बिकापुर, पंचायत अउ ग्रामीण विकास मंत्री श्री सिंहदेव ह दूरस्थ वनांचल के गांव मन म चौपाल लगाके मनखे मन के दुख-तकलीप ल सुनिन। ए दौरान गांव वाले मन के मांग म पेंडरखी म हेल्थ एंड वेलनेस सेंटर खोले अउ महिला मन बर 10 लाख रूपिया के लागत ले सामुदायिक भवन बनाये के घोसना मत्री जी ह करिन। श्री सिंहदेव ह ग्राम पहाड़ कोरजा अउ पेंडरखी म घलोक कार्यक्रम ल संबोधित करिन अउ मनखे मन के समस्या सुनके निराकरण करे के निर्देश अधिकारी मन ल दीन।
श्री सिंहदेव ह कहिन के बरसा के मौसम म उल्टी दस्त के प्रकोप बाढ़ जाथे। उल्टी दस्त ल रोके बर ओआरएस घोल अवश्य देवव। उमन कहिन कि अभींचे जनमें ले पांच साल के बीच के उम्मर के लइका मन के मृत्यु दर कम करे बर रोटा वायरस टीकाकरण चालू करे जात हे। पांच साल तक के सबो लइका मन ल ए टीका जरूर लगवाव। ए दौरान घर पहुच पेंशन सुविधा के पेंसन अउ बैंक सखी के माध्यम ले हितग्राही मन ल पेंशन के राशि घलोक वितरित करे गीस।
ए अवसर म उदयपुर जनपद अध्यक्ष श्री राजनाथ सिंह, उपाध्यक्ष श्री राजीव कुमार सिंह, जिला पंचायत सदस्य श्रीमती भोजवंती सिंह, संग आन जनपद प्रतिनिधी अकतहा पुलिस अधीक्षक श्री ओम चंदेल, उदयपुर के अनुविभागीय दंडाधिकारी श्री प्रदीप साहू, सीएमएचओ डॉ पी एस सिसोदिया, जनपद पंचायत के सीईओ श्री पारस पैकरा संग आन अधिकारी उपस्थित रहिन।
