विधानसभा के अवईया शीतकालीन सत्र या बजट सत्र म लाए जाही पत्रकार सुरक्षा कानून
मुख्यमंत्री ह 61 पत्रकार मन ल श्रमवीर सम्मान ले करिन सम्मानित
ग्राम पिहरीद म राहुल साहू के रेस्क्यू ऑपरेशन के समय रिकार्ड 109 घंटा जीवंत रिपोर्टिंग करईया पत्रकार मन ल सम्मानित करे खातिर समारोह के आयोजन
रायपुर, मुख्यमंत्री श्री भूपेश बघेल ह कहिन कि राज्य सरकार कोति ले पत्रकार मन ल स्वास्थ्य बीमा के लाभ देवाए बर जल्दी पहल करे जाही। पत्रकार मन के ये मांग के अध्ययन करके लउहे उचित निर्णय लेहे जाही। अभी हाल म मरीज मन के इलाज बर सहायता उपलब्ध कराए बर राज्य शासन कोति ले योजना संचालित करे जात हे। ये देखबो कि पत्रकार मन ल ए योजना मन के माध्यम ले कव्हर करे जा सकत हे या नहीं या एखर बर बजट म अलग से मद के प्रावधान करे के जरूरत परही। ये संबंध म जेन भी कदम उठाए ल परही ओ खच्चित उठाए जाही। जरूरी होही त विधानसभा म घलोक एला लाबो।
मुख्यमंत्री श्री बघेल ह आज राजधानी रायपुर के न्यू सर्किट हाउस के कॉन्क्लेव हॉल म आयोजित श्रमवीर सम्मान 2022-23 समारोह ल सम्बोधित करत ये बात कहिन।
सम्मान समारोह म मुख्यमंत्री श्री बघेल ह जांजगीर-चांपा जिला के ग्राम पिहरीद म राहुल साहू के रेस्क्यू ऑपरेशन के समय रिकार्ड 109 घंटे जीवंत कव्हरेज करईया 61 पत्रकार मन ल श्रमवीर सम्मान ले सम्मानित करिन। कार्यक्रम के आयोजन भारती श्रमजीवी पत्रकार संघ के छत्तीसगढ़ इकाई कोति ले करे गीस।
