पीएम सुरुज घर मुफ्त बिजली योजना ले बदलत हे जिंदगी

मदनपुर के मंजू थोरिया हर महीना करत हे हजारों के बचत
छै महीना ले बिजली बिल आवत हे ऋणात्मक, आत्मनिर्भरता कोति कदम
रायगढ़, खरसिया विकासखंड के मदनपुर गांव के मंजू थोरिया कभू हर महीना 2,500 ले 3,000 रूपिया तक के भारी-भरकम बिजली बिल चुकाए ल मजबूर रहिन। ये खर्च वोखर परिवार के घरेलू बजट म गहरा असर डालत रहिस। फेर प्रधानमंत्री सुरुज घर मुफ्त बिजली योजना ले जुडे के बाद वोखर जिंदगी ह नवा दिशा पकड़ लेहे हे। अब मंजू थोरिया ल बिजली बिल भरे ले मुक्ति मिल गए हे, संगेच पाछू छै महीना ले ओखर बिजली बिल ऋणात्मक आवत हे। ये ए पाए के संभव होए हे के वोखर घर के छत म लगाए गे सोलर पैनल ले उपजे अकतहा बिजली सीधा ग्रिड म जुड़त हे।
ए योजना के तहत मंजू ल रूफटॉप सोलर लगाय खातिर मिलइया सब्सिडी घलोक मात्र सात दिन के भीतर ही मिल गे। एखर से शुरुआती लागत के बोझ अड़बड़ कम हो गे अऊ परिवार ल आर्थिक राहत मिलीस। मंजू के पति श्री रश्मिरंजन बताथे के प्रधानमंत्री सुरुज घर मुफ्त बिजली योजना ह हमला असली राहत देहे हे। अब हमला बिजली बिल के चिंता नइ रहय भलुक बचत घलोक होवत हे अऊ घर के आमदनी म सकारात्मक असर परत हे। ये योजना उपभोक्ता मन ल बिजली बिल ले राहत देवत हे, संगेच देश ल ऊर्जा क्षेत्र म आत्मनिर्भर बनाए अऊ स्वच्छ ऊर्जा के उपयोग ल बढ़ावा देहे के दिशा म एक बड़का पहल साबित होवत हे।